रुपन्देहीको मायादेवी गाउँपालिकालाई पर्यटकीय गन्तव्य बनाइने भएको छ । विश्वशान्तिका अग्रदुत गौतम बुद्धको जन्मस्थल नजिक रहेको र गौतम बुद्धको माताको नामबाट नामाकरण भएको मायादेवीलाई पर्यटकीय गन्तव्य बनाइने भएको हो ।
समथर खेती योग्य भू–बनोट, उद्योग, व्यापार र पर्यटनको प्रचुर सम्भावना रहेको रमणीय मायादेवी गाउँपालिका भित्र पर्यटकीय पूर्वाधार विकास र प्रचारप्रसार गरेर आन्तरिक तथा बाह्य पर्यटकको आवागमन बढाइने गाउँपालिका अध्यक्ष ध्रुवनारायण चौधरीले बताए ।
रुपन्देही जिल्लाको पश्चिम उत्तर भागमा अवस्थित मायादेवी गाउँपालिकामा उत्तरबाट बग्ने तिनाउ र दानव नदीसँगै पर्यटकीय एवम् धार्मिकस्थल प्रकटेश्वर मन्दिर र मायादेवी पार्क लगायतका प्राकृतिक, भौगोलिक तथा साँस्कृतिक मनोरमता रम्न र घुम्न पाइन्छ । लुम्बीनी आउने पर्यटकलाई मात्रै मायाँदेवी सम्म तान्न सक्ने हो भने योगाउँपालिकाको समृद्धिको आधार पर्यटननै हुने निश्चित छ ।
