डडेलधुराको परशुराम नगरपालिकाका महिलाहरुले मेसिनबाट दुना, टपरी उत्पादन गर्न थालेका छन् । नगरपालिकाले स्थानीय महिलाहरुलाई सीप र साधन सहयोग गरेपछि महिलाहरु जागरुक भएर मेसिनबाट दुना, टपरी उत्पादनमा लागेका हुन् ।
परशुराम नगरपालिकाको १, ६, ७, र ११ गरी ४ वटा वडामा महिला शसक्तिकरणका लागि दुना, टपरी उत्पादन गर्ने उद्देश्यका साथ महिलाहरुलाई तालिम तथा प्रशिक्षणको कार्यक्रम सञ्चालन गरिएको मेयर भरत जोशीले बताए । यसबाट स्थानीय स्रोत, साधन र उत्पादनको प्रयोग गर्ने संस्कृतिको विकास भई स्थानीय महिलाहरुको आर्थिक अवस्थामा सुधार आउने अपेक्षा गरिएको उनको भनाई छ । नगरपालिकाले चारवटै वडामा १-१ थान मेसिन समेत हस्तान्तरण गरिसकेको छ ।
यो कार्यक्रमलाई विस्तार एवमु थप सुधार गर्दै आगामी आर्थिक वर्ष देखि परशुराममा प्लास्टिकका झोला, डिस्पोजल प्लेट लगायतका प्लास्टिकजन्य वस्तुहरू प्रतिबन्ध गर्दै स्थानीयस्तरमै वातावरण मैत्री वस्तुहरूको उत्पादन र उपभोग गर्ने नगरपालिकाले नीति अघि सारेको छ ।
