संसद्को राज्य व्यवस्था तथा सुशासन समितिका सभापति रामहरी खतिवडाले एनसेल काण्डबारे प्रधानमन्त्री पुष्पकमल दाहाल प्रचण्डले देश र जनतालाई सत्य तथ्य जानकारी दिनुपर्ने बताएका छन् । नेपाली जनतामा एनसेलबारे प्रश्न उठेको अवस्थामा प्रधानमन्त्रीकै तहबाट प्रारम्भिक अनुसन्धान गरेर सत्य तथ्य जानकारी दिनुपर्ने खतिवडाले बताएका हुन् ।
राज्य व्यवस्था तथा सुशासन समितिको बैठकले समेत यसबारे प्रधानमन्त्रीलाई समितिमा आएर जवाफ दिन अनुरोधात्मक निर्देशन दिने निर्णय गरेको सभापति खतिवडाको भनाई छ । नेपालमा एनसेलको करछलीबारे विगत लामो समययता प्रश्न उठिरहेको र अहिले खरिद विक्रिको सवाल झन पेचिलो बनेकाले अनुसन्धान गरेर कारबाहीको दायरामा ल्याउनुपर्ने र त्यसबारे प्रधानमन्त्री स्वयं बढी जिम्मेवार बन्नुपर्ने बताए । ‘पत्रपत्रिकामा समाचारहरु आइरहेका छन् । सामाजिक सञ्जाल तातिएको छ । एनसेनको विवाद पुरानै हो तर नयाँ नयाँ ढंगले राज्यलाई ठग्न खोजेको बुझिन्छ । यसबारे समितिमा आएर जानकारी दिन प्रधानमन्त्रीलाई बोलाएका छौं ।’ खतिवडाले भने, ‘प्रधानमन्त्री पनि यहि समितिको सभापति हुनुहो । उहाँ सहज रुपमा समितिमा आएर एनसेनबारे देश र जनतालाई जानकारी दिनुपर्छ’ विदेशी कम्पनीका लागि नेपालमा लगानीमैत्री वातावरण बनाउनुपर्ने तर करछली सम्मको अपराध गर्नेलाई कडा कारबाही गर्नुपर्ने खतिवडा बताउँछन् ।
समितिको बैठकमा सांसदहरु उपस्थित नभएको विषयमा भने सभापति खतिवडाले असन्तुष्टि जनाएका छन् । ‘कोही देश बनाउने खोक्रो आशा बाँडेर विदेश घुमिरहेका छन् । कोही मेचीकाली दौडमा छन् । महत्वपूर्ण समितिका बैठकहरुमा गयल हुनुराम्रो होइन ।’ कोरम पुगेर बैठक सञ्चालन भएपनि सबै सांसदहरु उपस्थित नहुनु ठिक नभएको उनको भनाई छ ।
