रोल्पाको थबाङ गाउँपालिका–५ कोटलबारा पहिरोमा परेर १० जनाको मृत्यु भएको पुष्टि भएको छ । रोल्पा प्रहरीका अनुसार अझै तीन जना बेपत्ता छन् ।
मृतक सबैको सनाखत पनि भइसकेको छ । मृतकमध्ये ५ जनाको शव रोल्पाका विभिन्न ठाउँमा भेटिएको हो भने, ५ जनाको शव छिमेकी जिल्ला प्युठानका खोला किनारमा भेटिएका छन् ।
जिल्ला प्रहरी कार्यालय रोल्पाका अनुसार रोल्पामै शव भेटिएकामा १८ वर्षीया शान्ति पुनमगर, ६० वर्षीय कमलबहादुर पुनमगर, ७५ वर्षीय दलबहादुर पुनमगर, ८० वर्षीया मनखना पुनमगर र ८५ वर्षीया हस्तकला रोकामगर छन् ।
यस्तै, प्युठानमा भेटिएका शवमा ७ वर्षीय अशोक पुनमगर, ३४ वर्षीय महेन्द्र घर्ती, ६६ वर्षीया मनी पुनमगर, ३४ वर्षीया विष्णु पुनमगर र ८० वर्षीय बलबहादुर पुन मगरका रहेको प्युठान प्रहरीले जनाएको छ । उनीहरूका आफन्तले शवको सनाखत गरेको प्रहरीले जनाएको छ ।
प्युठानका स्वर्गद्वारी नगरपालिकाका जुडापाटा, किमिचौर, गोठीबाङ, अर्दुस भन्ने ठाउँमा माडी खोलाको किनारमा चार वटा शव र स्वर्गद्वारी–५ सरोजास्थित लुङ्ग्री खोलाको किनारमा थप एक शव भेटिएको बताइएको छ ।
पहिरोमा परेर बेपत्ता हुनेमा ९ वर्षीय अशिम पुनमगर, ८० वर्षीय अजम्बर पुनमगर र ६१ वर्षीय लिलबहादुर पुनमगर छन् ।
पहिरोमा घाइते भएका २२ वर्षीय हिमाल पुनमगर र २५ वर्षीय सञ्जय घर्तीमगरलाई उपचारका लागि प्रादेशिक अस्पताल बुटवल पठाइएको रोल्पा प्रहरीले जनाएको छ ।
पहिरोमा परेर ९ घर, एक घुम्ती पसल, दुई गोठ र एक चर्च गरी १३ वटा संरचना बगाएको प्रहरीले जनाएको छ ।
प्रहरीका अनुसार बुधबार राति ८:४० बजेको समयमा बस्तीमाथिबाट पहिरो आएको थियो ।
