हेटौँडाका व्यवसायीहरुले दिउँसै बत्ति बालेर हेटौँडा उपमहानगरपालिकाका जनप्रतिनिधि खोजेका छन् । उपमहानगरपालिकाले गरेको राजश्व बृद्धिको बिरोधमा आन्दोलित भएका व्यवसायीले बिहीबार दिउँसै बत्ति बालेर जनप्रतिनिधि खोजेका हुन् ।
त्यस क्रममा व्यवसायीहरुले उपमहानगरपालिका परिसरमा आज पनि धर्ना दिएका छन् । त्यसअघि हेटौँडा–२ मा रहेको पल्पसा सदनबाट मैनबत्ती र मोबाइल बालेर व्यवसायीहरु ¥याली सहित उपमहानगरपालिका पुगेका थिए । उपमहानगरपालिका परिसर भित्र पनि उनीहरुले मैनबत्ती बालेर धर्ना दिएका थिए ।
गत ७ असारमा सम्पन्न नगरसभाबाट पारित गरेको नीति कार्यक्रम तथा बजेटमार्फत उपमहानगरपालिकाले अस्वभाविक रुपमा कर बृद्धि गरेको भन्दै व्यवसायीहरु आन्दोलनमा उत्रिएका छन् । उनीहरुले उपमहानगरपालिकाले विभिन्न शिर्षकमा १६ देखि १५० प्रतिशतसम्म कर बृद्धि गरेको भन्दै आन्दोलन गरेका हन् ।
व्यवसायीहरुले करको नयाँ दर खारेज गर्नुपर्ने माग गर्दै आन्दोलन घोषणा गरेका छन् । आन्दोलनका कार्यक्रम अन्तर्गत बिहीबार मैनबत्ती बालेर जनप्रतिनिधि खोजेका व्यवसायीहरुले भोली शुक्रबार सम्पूर्ण व्यवसाय बन्द गरेर चाबि उपमहानगरपालिकामा बुझाउने बताएका छन् । त्यत्ति गर्दा पनि आफुहरुको मागको सुनवाई नभए उपमहानगरपालिकाको निर्णय बिरुद्ध अदालत जाने उनीहरुको दावी छ ।
यसैविच एमालेका तर्फबाट प्रतिनिधित्व गर्ने ४८ जना जनप्रतिनिधिहरुले बुधबार विशेष नगरसभाको माग गर्दै उपमहानगरपालिकामा निदेन दर्ता गराएका छन् ।
