लुम्बिनी प्रदेशका मुख्यमन्त्री चेतनारायण आचार्यले विश्वासको मत प्राप्त गरेका छन् । आज बसेको लुम्बिनी प्रदेश सभाको चौथो अधिवेशनको २५ औ बैठकमा भएको मत विभाजनमा विश्वासको मतको पक्षमा ७० र विपक्षमा ११ मत परेको छ । सो मत प्रदेश सभाको बहुमत रहेको भन्दै मुख्यमन्त्रीले पेश गरेको विश्वासको मत सम्बन्धी प्रस्ताव बहुमतले स्वीकृत भएको घोषणा सभामुख तुलाराम घर्ती मगरले गरेका थिए ।
संघमा सत्तासमीकरण फेरिएसँगै गत साउन ७ मा आचार्य मुख्यमन्त्रीमा नियुक्त भएका थिए । ८७ प्रदेश सभा सदस्य रहेको लुम्बिनीमा बहुमतका लागि ४४ मत आवश्यक पर्नेमा मुख्यमन्त्रीले ७० मत पाएका छन् । नयाँ सत्ता समिकरण सगै मुख्यमन्त्री बनेका आचार्यको पक्षमा एमाले र कांग्रेस तथा अन्य केही साना दलहरुले मत दिएका छन् । प्रदेश सभामा एमालेका २९, कांग्रेस, २७, माओवादी ११, राप्रसा ४, नाउपा ४, जनमत ३, लोसपा ३, जसपा २, जसपा नेपाल १, नेकपा एकीकृत समाजवादी १, राजमो १ र स्वतन्त्र एक गरी ८७ जना सदस्य रहेका छन् ।
प्रदेश सभा बैठकमा आफ्नो पक्षमा विश्वासको मत दिन सबै दललाई आब्हान गर्दै मुख्यमन्त्री आचार्यले प्रदेशको विकासका लागि सबै सबै एक ठाउमा उभिनुपर्नेमा जोड दिएका थिए ।
विश्वासको मत पाए तर मन्त्रीमण्डलले पूर्णता पाएन
मुख्यमन्त्री नियुक्त भएको २९ औं दिनमा मंगलवारको प्रदेश सभाको बैठकबाट मुख्यमन्त्री आचार्यले विश्वासको मत पाए पनि मन्त्रीपरिषदलाई अझै पूर्णता दिन सकेका छैनन् । यहाँ १२ सदस्यीय मन्त्रीमण्डल रहने ब्यवस्था गरिएको छ र मुख्य सत्ता घटक कांग्रेु र एमालेवीच सोही अनुसारको समझदारी पनि रहेको छ । तर यहा एमाले र कांग्रेसबाट पाच पाच जना सहभागि हुने भनिएकोमा कांग्रेसले एक जना मन्त्री टुंगाउन नसक्दा मन्त्रीमण्डलले पूर्णता पाउन नसकेको हो ।
हाल मुख्यमन्त्रीसहित एमालेका पाच र कांग्रेसबाट ४ जना मन्त्री रहेका छन् । २ जना मन्त्री साना दलबाट सहभागि गराउने कांग्रेस एमालेले बताउदै आएका छन् । तर साना दल कुन कुनलाई सहभागि गराउने भन्ने निष्कर्षमा पनि यहा सत्ता रुढ दल पुग्न सकेका छैनन् ।
