सफल सगरमाथा आरोही कुंगा शेर्पालाई खिजीदेम्बाको सद्भावनादूत घोषणा गरिएको छ । ओखलढुंगाको खिजीदेम्बा गाउँपालिकाको पर्यटन प्रवर्द्वनका लागि आरोही शेर्पालाई सद्भावनादूत घोषणा गरिएको हो ।
गाउँपालिकाले काठमाडौंमा सगरमाथाको सफल आरोहण गर्ने खिजीदेम्बाका आरोहीहरुलाई सम्मान कार्यक्रम राखेर सोहि कार्यक्रमका बीच पर्यटन सद्भावना दुत घोषणा गरेको छ ।
स्वावलम्बी, कीर्तिमानी र कर्मशिलहरुलाई खिजीदेम्बाको साथ: सहासिक पदयात्रा मार्फत पर्यटन प्रबर्द्वनमा मिलाउँ हातमा हात भन्ने उद्घोष सहित खिजीदेम्बाले पालिकाबाट सगरमाथा चढेका ४६ जना आरोहीलाई सम्मान गर्न आयोजित कार्यक्रममा प्रमुख अतिथि पर्यटन मन्त्री बद्रिप्रसाद पाण्डे र आरोही शेर्पा बीच सम्झौता पत्र आदानप्रदान गरिएको छ ।
सद्भावनादूत शेर्पा खिजीदेम्बा ६ का स्थायी बासिन्दा हुन् । ८ पटक सफल सगरमाथा आरोहण गरेका शेर्पाले यसवर्ष खिजीदेम्बा गाउँपालिकाको लोगो सगरमाथाको चुचुरोमा फहराएका थिए ।
पर्यटनको प्रचुर सम्भावना भएको पालिकालाई पर्यटन मार्फत नै समृध्दि बनाउने लक्ष्य अनुरुप आरोही सम्मान, सद्भावनादूत घोषणा जस्ता कार्यक्रम राखिएको र पर्यटन विकासलाई प्राथमिकता दिइएको गाउँपालिका अध्यक्ष गम्बु शेर्पाको भनाइ छ ।
खिजीदेम्बाले पर्यटन विकासमा गरेको कामको सरोकारवालाले प्रशंसा गरेका छन् ।
