ओखलढुंगामा छायांकन गरिएको चलचित्र ‘पूर्णबहादुरको सारंगी’ को टेलर सार्वजनिक भएको छ । आगामी कात्तिक १५ लक्ष्मीपूजाका दिनबाट प्रदर्शनमा आउन लागेको फिल्म ‘पूर्णबहादुरको सारंगी’ को ३ मिनेट २६ सेकेन्डकाे टेलर सेभेन सिज सिनेमाको अफिसियल युट्युब च्यानलबाट सार्वजनिक गरिएको हो ।
टिजरमा फिल्मका मुख्य दुई पात्र विजय बराल र प्रकाश सपूत फिचर्ड छन् । गरिबीका कारण बुवाले झेल्नुपरेको अभाव, छोराले पाएको शैक्षिक सफलता र विछोडको पीडा टिजरमा समेटिएको छ ।
अभिभावकले आफ्नो सन्तानको प्रगति र खुसीका लागि गर्ने त्याग र संघर्ष तथा त्यसले दिने उपलब्धि समेटेको चलचित्र ओखलढुंगाको रुम्जाटारमा छायांकन गरिएको हाे ।
निर्माता विनोद पौडेलका अनुसार ‘पूर्णबहादुरको सारंगी’ एक विपन्न बुवाको आफ्नो सन्तानप्रतिको सपना पूरा गर्न गरिने संघर्षको कथा हो ।
सरोज पौडेलको लेखन तथा निर्देशन रहेको फिल्ममा विजय र प्रकाशसँगै मुकुन भुसाल, बुद्धि तामाङ, अञ्जना बराइली, माओत्से गुरुङ, देशभक्त खनाल, भोलाराज सापकोटा, विनोद न्यौपाने, अलिस बास्तोला, श्याम केसी, जानवी पौडेललगायतको अभिनय छ ।
सेभेन सिस सिनेमा र बासुरी फिल्मसको प्रस्तुति रहेको फिल्मका निर्माता विनोद पौडेल र प्रतीक सुवेदी हुन् । यो फिल्मलाई नेपाल र अन्तर्राष्ट्रिय रूपमा सेभेन सिज इन्टरटेन्मेन्टले वितरण गर्दै छ ।
सोसल–ड्रामा जनरामा निर्माण भएको फिल्म गन्धर्व परिवारको कथामा आधारित छ। फिल्मको पटकथा तथा संवाद महेश दवाडीले लेखेका छन् । विनोद पौडेल र प्याट्रिक सुवेदी लगानी रहेको फिल्मका कार्यकारी निर्माता रमेश चौलागाईं, हरि श्रेष्ठ र रमेश ढकाल हुन् ।
फिल्ममा प्रशान्त सिवाकोटीको संगीत, हेमन्त कान्छा रसाइलीको सारंगी, प्रशान्त सिवाकोटी, मेलिना राई र पुष्पन प्रधानको स्वर रहेको छ ।
