नेपाली कांग्रेसले शिक्षा नीतिमा बहस गर्ने भएको छ । नेपालको शैक्षिक रुपान्तरण, विद्यमान शिक्षा नीति, परिमार्जनका विषय र युग सुहाउँदो शैक्षिक विकास र गुणस्तर सुधारमा छलफल गर्ने र आधिकारी धारणा बनाएर पार्टी मार्फत सरकारलाई सुझाव दिने गरी नेपाली कांग्रेस केन्द्रीय शिक्षा विभागले शिक्षा नीति बहस गर्ने भएको हो ।
यहि मंसिर १९ गते, बुधबार दिउँसो १ बजे नेपाली कांग्रेस केन्द्रीय कार्यालय, सानेपामा विशेष शैक्षिक छलफल तथा कार्यशाला आयोजना गरिएको कांग्रेस केन्द्रीय शिक्षा विभागका सदस्य राजन श्रेष्ठले अनलाइन सरोकारवालाई जानकारी दिए ।
नेपाली कांग्रेस केन्द्रीय सदस्य एवम् केन्द्रीय शिक्षा विभाग प्रमुख नैनसिंह महरको अध्यक्षतामा हुने कार्यशालालाई पार्टी सभापति एवम् पूर्व प्रधानमन्त्री शेरबहादुर देउवाले सम्बोधन गर्नेछन् ।
शिक्षा विभागले सभापतिलाई भेटेर प्रमुख अतिथिको निम्तो दिँदै कार्यशालाको औचित्य प्रष्ट्याइसकेको छ ।
विशेष अतिथिमा कार्यक्रममा नेपाली कांग्रेसका उपसभापति, महामन्त्री, सहमहामन्त्री, कोषाध्यक्ष एवम् केन्द्रीय सदस्यहरु र अतिथि तथा सहभागीहरुमा कांग्रेसका तर्फबाट रहेका पूर्व शिक्षामन्त्री, प्रदेशका मुख्यमन्त्रीहरु, सबै प्रदेशका कांग्रेस अध्यक्षहरु, प्रदेश र संघीय संसदीय शिक्षा समितिका सदस्यहरु, विश्वविद्यालयका पूर्व उपकुलपतिलगायत पदाधिकारीहरु, राष्ट्रिय योजना आयोग र प्रदेश नीति आयोगका पूर्व उपाध्यक्ष एवम् सदस्यहरु, कांग्रेसका प्रदेश शिक्षा विभाग प्रमुखहरु, भातृ र शुभेच्छुक संस्थाका अध्यक्षहरु, प्रजातन्त्रवादी प्राध्यापक संघका पदाधिकारीहरु, नेपाल शिक्षक महासंघ र नेपाल शिक्षक संघका पदाधिकारीहरु र स्वतन्त्र विद्यार्थी युनियनका सभापतिहरु रहनेछन् ।
यो कार्यशालाले नेपालको शैक्षिक क्षेत्रमा नवीन सोच र रणनीति तय गर्न मार्ग प्रशस्त गर्ने लक्ष्य लिईरहेको नेपाली कांग्रेस केन्द्रीय शिक्षा विभागले जनाएको छ । कार्यक्रममा सहभागिताका लागि सबैमा अपिल गरिएको छ ।
