नेपाल शेर्पा संघ, बागमती प्रदेश समितिको दोस्रो अधिवेशनको तयारी पूरा भएको छ । वैशाख २७ गते राजधानीको जोरपाटीमा हुने अधिवेशनको तयारी पूरा भएको हो ।
अधिवेशनमा प्रदेशभित्रका सिन्धुपाल्चोक, दोलखा, रामेछाप, काठमाडौंसहित शेर्पाको सघन बसोबास रहेको क्षेत्र र विभिन्न किदुग, आबद्ध संस्थाको प्रतिनिधिहरु सहभागि रहने प्रदेश अध्यक्ष आङछिरी शेर्पाले जानकारी दिए ।
प्रदेश अधिवेशनमा स्थानीय तह (पालिकाबाट) ३ जना र जिल्लाबाट अध्यक्षसहित ५ जना प्रतिनिधि सहभागी हुन पाउने व्यवस्था छ । त्यस्तै, आबद्ध संस्था, किदुकबाट समेत प्रतिनिधिहरु सहभागिता रहने गरी तयारी भइरहेको अध्यक्ष शेर्पाको भनाइ छ ।
अधिवेशन सम्पन्न गर्न केन्द्रले सघीय उपाध्यक्ष दावा शेर्पालाई संयोजक तोकेको छ । सहसंयोजकको जिम्मेवारी केन्द्रीय सदस्य फुरलाक्पा शेर्पालाई दिइएको छ ।
बागमती प्रदेश अन्तर्गत ललितपुर, रामेछाप, काठमाडौं लगायतको जिल्ला सभा सम्पन्न भइसकेका छन् । दोलखा र सिन्धुपाल्चोकको वैशाख २६ गते सम्पन्न हुने र सोही दिन प्रतिनिधिको नाम पठाउने तयारी भइरहेको छ ।
संघको विधान २०४८ को छैटौं संशोधन २०८१ अनुसार वडातह देखि नै प्रतिनिधि चयन गरेर आउनुपर्ने व्यवस्था रहेको र विद्यानलाई कडाईका साथ लागू गरिने संयोजक दावा शेर्पाले जानकारी दिए ।
वडामा कम्तीमा ३५ जना शेर्पाहरुले सदस्यता प्राप्त गरेपछि वडासमिति गठन हुने र वडादेखि प्रतिनिधि चयन गरी तहगत अधिवेशन सम्पन्न गर्ने प्रावधान छ ।
अधिवेशनको उद्घाटन सत्र सञ्चार तथा सूचना प्रविधि मन्त्री पृथ्वीसुब्बा गुरुङको प्रमु्ख आतिथ्यतामा हुने र विभिन्न सांस्कृतिक झाँकी तथा कलाकारहरुको समेत प्रस्तुती रहने गरी तयारी गरेको सदस्य लाक्पा शेर्पाले जानकारी दिए ।
