सूर्यदेवको श्रद्धा भक्तिपूर्वक पूजा आराधना गरी मनाइने छठपर्व आज बिहान उदाउँदो सूर्यलाई अघ्र्य दिएपछि सम्पन्न भएको छ ।
उदाउँदो सूर्यलाई नदी किनारमा बसी पूजा आराधनासहित गाईको दूध, फूल र जलले अघ्र्य दिएपछि छठ सम्पन्न हुने धार्मिक विधि छ ।
यसरी घाटमा गरिने पूजालाई भिन्सरघाट भनिन्छ । बिहानै घाटमा गरिने पूजा भएकाले भिन्सरघाट भनिएको हो । सूर्योदयकालमा अघ्र्य दिई सूर्यको दर्शन गरेपछि छठ पूजा सकिन्छ । सूर्यको दर्शन गर्दा भक्तहरू लुगासहित कम्मरसम्मको पानीमा डुबेर सूर्य दर्शन गर्ने विधि छ ।
पृथ्वीमा भएका जीवको सञ्चालन र संरक्षण जल एवं सूर्यबाट भएकाले नदीलाई माता, सूर्यलाई सम्पूर्ण शक्तिको स्रोतका रूपमा मानी विशेष पूजा गर्ने गरिएको धार्मिक विश्वास छ ।
छठ पर्व तराई-मधेशसहित काठमाडौं उपत्यकामा उल्लासका साथ मनाइएको छ । काठमाडौंमा पशुपति क्षेत्रको गौरीघाट र कमलपोखरीमा छठ मनाइएको छ ।
गौरीघाटमा यसपटक ७०० भन्दा बढी छठ पूजास्थल निर्माण गरिएको थियो । त्यहीँ पुगेर बिहानै भक्तजनले उदाउँदो सूर्यलाई अर्घ्य दिएर छठ पर्व समापन गरेका छन् ।
यसपटक गौरीघाटमा पाँच लाखभन्दा धेरैले पूजा गरेको जनाइएको छ । आज बिहान उदाउँदो सूर्यलाई अर्घ्य दिएसँगै यो सालको छठ समापन भएको छ ।
