कपिलवस्तुको शुद्धोधन गाउँपालिकामा छाडा चौपाया व्यवस्थापन गर्न थालिएको छ । स्थानीयले जथााभावी सडक र सार्वजनिक स्थलहरुमा छाडेका पशुवस्तुले हैरानी दिइरहेका बेला जनप्रतिनिधिले छाडा चौपाया व्यवस्थापनको दिगो प्रयास गरेका हुन् ।
पालिकाको वडा नं. ४ क्षेत्रमा छाडा पुशवस्तुका कारण समस्या थियो । वड़ाध्यक्ष नरेश यादव, स्थानीय अगुवा प्रीतम् पाण्डेयलगायतका स्थानीयले छाडा चौपायाका लागि सुरक्षित बासस्थानको व्यवस्था मिलाएका छन् ।
तारघेराबार लगाएर छाडा चाैपाया राख्ने ठाउँ बनाइएकाे छ । जथाभावी छाडिएका चाैपाया त्यहाँ लगेर राख्ने तयारी छ । त्यहाँ राखिएका पशुकाे आहारको समेत व्यवस्था गरिनेछ ।
छाडा चौपायाकाे दिगाे व्यवस्थापन गरिएकाे क्षेत्रकाे गाउँपालिका अध्यक्ष कमलेश शरण चौधरीले अवलाेकन गरेका छन् ।
जथाभावी पशुचौपाया नछाड्न स्थानीयलाई अपिल गर्दै छाडिएका चौपायको दिगो व्यवस्थापन गरिएको गाउँपालिका अध्यक्ष चौधरीले बताए ।
सभ्य र सुरक्षित समाज निर्माणका लागि नागरिक स्तरबाटै अभियान थालनी गरिने अध्यक्ष चौधरीको भनाई छ ।
छाडा चौपायाले किसानका खेतबारीमा लगाएका बाली नष्ट गरेको र सडकमा दुर्घटनाको जोखिम बढाएको भन्दै गाउँपालिकाले छाडा चौपाया व्यवस्थापनको नीति लिएको छ ।
