दुर्गम जिल्ला बाजुराको पनि अति दुर्गम गाउँ बिच्छयाँमा विजुली बालिएको छ । हिमाली गाउँपालिकाको पहल र कादुरी एग्रिकल्चरल एड एसोसियन ब्रिटिस गोर्खाज् नेपालको आर्थिक सहयोगमा मानव विकासमा नेपालमै सबैभन्दा पछि परेको गाउँमा विजुली बालेर झिलिमिली बनाईएको हो ।
हिमाली गाउँपालिका २ स्थित नातीखोलाबाट उत्पादित जलविद्युत आयोजना उपभोक्तालाई हस्तान्तरण गरिएको छ ।
पुस्तौदेखि अन्धकारमा बस्न बाध्य बिच्छयाँका स्थानीय अब अध्याँरोबाट मुक्त भएको हिमाली गाउँपालिका अध्यक्ष गोविन्दबहादुर मल्लले अनलाइन सरोकारसँग बताए । हिमालीको वडा नम्बर १, २ र ३ मा यो योजना विगत वर्षहरुदेखि सञ्चालनमा थियो । केही समय रोकिएको विद्युत विकासको काम स्थानीय जनप्रतिनिधिकै पहलमा अघि बढेपछि सम्पन्न आयोजनाबाट साविकको विच्छ्या गाविसका ६ सय ८२ घरपरिवार नागरिकले विद्युत उपभोग गर्न पाएका हुन् ।
हिमालीको वडा नम्बर ५ स्थित क्युडी गाउँमा समेत विद्युत विस्तारको काम भईरहेको छ । १ सय २० घरपरिवार रहेको यो गाउँमा केही महिना भित्रै विजुली बाल्ने गरी काम भईरहेको गाउँपालिकाले जनाएको छ ।
करिव १४ करोड ५५ लाख रुपैयाँ लागतमा सम्पन्न भएको १ किलोवाट क्षमताको विद्युत सेवाबाट बाजुराको हिमाली गाउँपालिकाको विच्छ्याबासीसँगै हुम्लाको ताँजाकोट गाउँपालिकाको मासफुर बस्तीका नागरिकहरु समेत लाभान्वित हुनेछन् ।
