बागलुङको तमानखोला गाउँपालिका–२ मा अवस्थित धार्मिक, प्राकृतिक तथा ऐतिहासिक महत्त्व बोकेको बह्रा ताल हाल पूर्वाधार विकाससँगै नयाँ स्वरुपमा देखिन थालेको छ । स्थानीय तह, प्रदेश सरकार र स्थानीयवासीको सक्रिय सहभागिता तथा जनश्रमदानले ताल क्षेत्र अहिले मनमोहक पर्यटन गन्तव्यका रूपमा उदाउँदै गएको छ ।
ताललाई परिक्रमा गर्न सकिने गरी ढुङ्गा बिछ्याएर पैदलमार्ग निर्माण गरिएको छ । साथै आकर्षक प्रवेशद्वार, वरिपरिको मन्दिर र ढकमक्क फुलेका गुराँसले ताललाई अझ लोभलाग्दो बनाएका छन् ।
करिब ५०० वर्षअघि पानीको स्रोत खोज्ने क्रममा बाउबाजेले यस ताललाई पत्ता लगाई खानेपानीका रूपमा प्रयोग गरेको ऐतिहासिक किम्बदन्ती छ । धार्मिक मान्यता र इतिहाससमेत बोकेको यो ताल अहिले तमानखोला गाउँपालिकाको मुख्य पर्यटकीय सम्पदामा रहेको तमानखोला गाउँपालिका २ का स्थानीय बासी रणबहादुर बरालले अनालइन सरोकारलाई बताउनु भयो ।
गाउँपालिका र वडाको प्रयास सीमित रहे पनि संघीय तथा प्रदेश सरकारको पर्याप्त सहयोग र प्रचार–प्रसार हुन सकेमा गण्डकी प्रदेशकै प्रमुख पर्यटकीय गन्तव्य बनाउन सकिने स्थानीयवासीहरूको विश्वास छ ।
