रामेछापको रामेछाप नगरपालिका यहि भदौ २१ गते शनिबार बालमैत्री स्थानीय शासनयुक्त पालिका घोषणा हुँदैछ । यसका लागी अहिले नगरपालिकाले तयारीलाई तिव्र बनाएको छ ।
बाल अधिकारको संरक्षण, प्रबर्धन र सहभागितालाई सुनिश्चित गर्दै नगरपालिकालाई बालमैत्री स्थानीय शासनयुक्त पालिका घोषणा गर्न अहिले तयारी लगभग अन्तिम चरणमा पुगेको छ । मूल आयोजक समिति सहित १० वटा उपसमिति गठन गरेर अहिले घोषणा समारोहका लागी विभिन्न कामहरु भैरहेको छ ।
बाग्मती प्रदेशका मुख्य मन्त्री इन्द्र बहादुर बानियाँको प्रमुख आतिथ्यतामा घोषणा समारोह हुनेछ । रामेछाप नगरपालिका ८ को टुँडीखेलमा हुने कार्यक्रममा उपस्थितीका लागि नगरपालिका प्रमुख लबश्री न्यौपानेले सबैमा अनुरोध गर्नुभएको छ ।
रामेछाप नगरपालिकाले २०७८ फागुन २ गतेदेखि बालमैत्री स्थानिय शासन अवलम्बन गरी बाल अधिकारको क्षेत्रमा सक्रिय रुपमा काम गरिरहेको छ । नगरपालिकाका ९ वटै वडाहरु एकैसाथ जेठ २७ गते बालमैत्री घोषणा भैसकेका छन ।
नगर घोषणा पश्चात् बालबालिकामैत्री नीति, योजना तथा संरचनाहरू थप प्रभावकारी रूपमा कार्यान्वयन गरिने अपेक्षा गरिएको छ । जिल्लाको मन्थली नगरपालिका यसअघि बालमैत्री स्थानीय शासनयुक्त पालिका घोषणा भैसकेको छ ।
