मुगुको छायाँनाथ रारा नगरपालिकामा ‘१ मुख, १० रुख’ अभियान प्रभावकारी बनेको छ । पर्यावरणीय, पर्यटकीय र आर्थिक रुपमा समेत लाभ लिँदै जलवायु र प्राकृतिक स्रोतको संरक्षण गरेर छायाँनाथ रारालाई हरित नगर बनाउने उद्देश्यले सुरु गरिएको १ व्यक्तिले १० वटा विरुवा रोप्ने ‘१ मुख, १० रुख’ अभियान प्रभावकारी बनेको हो ।
नगरप्रमुख विष्णुकुमार भामले निर्वाचित भए लगत्तै औपचारिक रुपमा वृक्षारोपण अभियानको शुभारम्भ गरेका थिए । विश्वमा चर्चित रारा ताल र छायाँनाथ धामसहितका सुन्दर पर्यटकीय क्षेत्र भएको नगरपालिकालाई हरित नगर बनाउने अभियानमा अहिले सबै नगरबासी स्वस्फुर्त जुटेका छन् ।
नगरपालिकालाई स्वच्छ, सुन्दर र हरावरा बनाउन नगरपालिका भित्रका सबै घर र सरकारी कार्यालय, विद्यालयहरु र संघ संस्थामा आवद्ध व्यक्तिहरुले आफु बस्ने ठाउँ वरिपरि विरुवा रोप्न र आफुले रोपेका विरुवा संरक्षण समेत गर्न थालेका छन् ।
नगरपालिकाले चालु आर्थिक वर्षको नीति कार्यक्रममा पनि पहिरो नियन्त्रण तथा भू–संरक्षणका लागि वृक्षारोपण गर्ने कार्यक्रमलाई निरन्तरता दिएको छ । छायाँनाथ रारामा १ जना व्यक्तिले अनिवार्य १० वटा विरुवा रोप्नुपर्ने छ ।
यो अभियानले छायाँनाथको स्वच्छता र सुन्दरता बढेको नगरप्रमुख विष्णुकुमार भामको भनाई छ ।
प्रदुषण बढिरहेका बेला वृक्षारोपण गर्दा अक्सिजन उत्सर्जन बढ्ने, तापक्रम नियन्त्रण हुने, माटोको कटान राकिने र जमिन उर्वर हुने, फलफूल, दाउरा, जडीबुटी, काठ लगायतबाट आम्दानी हुने, पर्यटन विकासमा योगदान पुग्ने, कृषि उत्पादनमा सहयोग पुग्ने, भूक्षय, बाढी र सुख्खा जस्ता प्राकृतिक प्रकोप कम गर्ने जस्ता फाईदा हुने भएकाले वृक्षारोपण कार्यक्रमलाई घरघरमा पु¥याइएको नगरपालिकाले जनाएको छ ।
शुद्ध हावा पाइने भएकाले श्वासप्रश्वास प्रणालीलाई फाइदा पुग्ने, मानसिक शान्ति र सौन्दर्य प्रदान गर्ने र सामुदायिक स्तरमा वृक्षारोपणले ऐक्यबद्धता र सामाजिक सहकार्य बढाउने भएकाले पनि छायाँनाथ राराका नागरिक ‘१ मुख, १० रुख’ अभियानमा जोडिएका छन् ।
