सुनसरी निर्वाचन क्षेत्र नम्बर–१ मा श्रम संस्कृति पार्टीका अध्यक्ष हर्क साम्पाङ विजयी भएका छन् । आइतबार (फागुन २४) दिउँसो सार्वजनिक अन्तिम मत परिणामा ३५ हजार ७४१ मत प्राप्त गर्दै उनी सांसद निर्वाचित भएका हुन् । श्रम संस्कृतिका उमेदवारले जितेको यो दोस्रो सिट हो ।
उनका निकटतम प्रतिस्पर्धी राष्ट्रिय स्वतन्त्र पार्टी (रास्वपा)की उमेदवार गोमा तामाङले २७ हजार २४९ मत ल्याइन् । साम्पाङले तामाङलाई आठ हजार ४९२ मतान्तरले पराजित गरे ।
तेस्रो स्थानमा रहेका नेकपा (एमाले)का उमेदवार टिकाराम लिम्बूले ६ हजार ४६३ मत पाए ।
नेपाली कम्युनिस्ट पार्टी (नेकपा)का सूर्यबहादुर भट्टराईले ६ हजार १८५, पाँचौँ स्थानमा रहेका नेपाली कांग्रेसका उमेदवार सुजेन्द्र तामाङले तीन हजार ९७० मत ल्याएका निर्वाचन आयोगले जनाएको छ ।
०७९ सालको निर्वाचनमा यो क्षेत्रमा एमालेको समर्थनमा जनता समाजवादी पार्टी नेपालका नेता अशोक राई विजयी भएका थिए । रास्वपाकी तामाङ दोस्रो स्थानमा थिइन् । यसपटक पनि उनी दोस्रो स्थानमै रहिन् ।
