परराष्ट्रमन्त्री शिशिर खनालले नेपालका नवनियुक्त प्रधानमन्त्री बालेन्द्र शाह (बालेन)लाई भारतीय प्रधानमन्त्री नरेन्द्र मोदीले भ्रमणको निम्तो दिएको बताएका छन् । नवौँ हिन्द महासागर सम्मेलनका क्रममा मौरिससमा रहेका परराष्ट्रमन्त्री खनालले भारतीय पत्रकारसँग कुराकानी गर्दै उनले प्रधानमन्त्री शाहले मोदीको भारत भ्रमणको निम्तो स्वीकार गरिसकेको बताए ।
“भारतीय प्रधानमन्त्री नरेन्द्र मोदीले दिएको निमन्त्रणलाई प्रधानमन्त्री बालेन शाहले स्वीकार गरिसक्नुभएको छ । दुई देशबीचको उच्चस्तरीय भ्रमण र द्विपक्षीय परियोजनाहरूलाई प्राथमिकतामा राखेर काम अघि बढाइनेछ,” परराष्ट्रमन्त्री खनालले भने । चैत १३ मा पदभार ग्रहण गरेलगत्तै मोदीले बधाई सन्देशमार्फत यो निम्तो दिएको परराष्ट्रमन्त्री खनालले जानकारी दिए ।
उनले सरकारले आगामी १० वर्षमा नेपालको कुल गार्हस्थ उत्पादन (जीडीपी) दोब्बर बनाउने लक्ष्य राखेको बताएका छन् । साथै, नेपाललाई ‘कम विकसित देश’बाट ‘मध्यम आय भएको देश’मा स्तरोन्नति गर्ने लक्ष्य रहेको बताए ।
“सरकारले आगामी १० वर्षमा नेपालको कुल गार्हस्थ उत्पादन (जीडीपी) दोब्बर बनाउने र नेपाललाई ‘कम विकसित देश’बाट ‘मध्यम आय भएको देश’मा स्तरोन्नति गर्ने लक्ष्य राखेको छ,” परराष्ट्रमन्त्री खनालले भने ।
यसका लागि सुशासन (भ्रष्टाचार नियन्त्रण र डिजिटल सेवा) र आर्थिक सुधार (पर्यटन, पूर्वाधार र जलविद्युत्)मा विशेष जोड दिइएको उनको भनाइ छ ।
उनले परराष्ट्र नीतिका सम्बन्धमा पनि भनाइ राखेका छन् । नयाँ सरकार भए तापनि परराष्ट्र नीतिमा निरन्तरता कायम राख्ने र संविधानले निर्दिष्ट गरेका सार्वभौमिकता, भौगोलिक अखण्डता र असंलग्नताको सिद्धान्तमा अडिग रहने प्रतिबद्धता व्यक्त गरे ।
खाडी मुलुकमा कार्यरत करिब २० लाख नेपालीको सुरक्षा र यस संकटले नेपालको रेमिट्यान्स, इन्धनको मूल्य र मलखाद आपूर्तिमा पार्न सक्ने प्रभावबारे सरकार गम्भीर रहेको पनि बताए । यस विषयमा भारतीय विदेश मन्त्रीसँग छलफल भएको जानकारी दिए ।
