प्रधानमन्त्री वालेन्द्र शाह (बालेन)लाई भेट्न राष्ट्रिय स्वतन्त्र पार्टी (रास्वपा)का सभापति रवि लामिछाने आइतबार (साउन २४) बेलुका बालुवाटार पुगे । सरकार र रास्वपाबीच पछिल्लो समय तिक्तता बढिरहेको चर्चा भइरहेका बेलाको यो भेटलाई राजनीतिक रूपमा अर्थपूर्ण मानिएको छ ।
प्रधानमन्त्रीको सरकारी निवासमा बालेन र रविबीच करिब ४५ मिनेट कुराकानी भएको बूढानीलकण्ठ स्रोतले पुष्टि गरेको छ । उनीहरू दुईले यसअघि चार घण्टासम्म वार्ता र छलफल गरेका थिए । बालेन रास्वपाका वरिष्ठ नेता पनि हुन् ।
आफ्नै सरकारविरुद्ध रास्वपाका सांसदले खबरदारी र आलोचना गर्न थालेकामा प्रधानमन्त्री बालेन सन्तुष्ट छैनन् । शुक्रबार (साउन २२) राति उनले सामाजिक सञ्जाल फेसबुकमा आफू विभिन्न चुनौतीसँग एक्लै लड्नुपरेको आशयको स्टाटस लेखेका थिए ।
“केही समय लाग्छ, सही समय आउनलाई । ढिला होला, तर गलत हुँदैन । नआत्तिनुहोस् । सुनेको र देखेको भन्दा वास्तविकता कहिलेकाहीँ फरक हुनसक्छ । कहिलेकाहीँ एक्लै लड्नुपर्छ, यो पहिलोचोटि होइन,” बालेनले लेखेका थिए ।
त्यसपछि रास्वपाका नेता मनिष झाले प्रतिनिधिसभा बैठकमै सरकारको कार्यशैलीप्रति असन्तुष्टि जनाउँदै खबरदारी गरेका थिए ।
यस्तो अवस्थामा दुई नेताबीचको भेटमा पछिल्लो राजनीतिक परिस्थिति, सरकार सञ्चालन, पार्टीका पदाधिकारी मनोनयन, राजदूत नियुक्तिलगायत विषयमा छलफल भएको रविनिकट स्रोतले जनाएको छ ।
सभापति रविले मनोनयन गर्ने उपसभापति गृहमन्त्री सुधन गुरुङ वा पूर्वाधार विकासमन्त्री सुनिल लम्साल को बन्ने भन्ने विषय टुंगिएको छैन ।
पदाधिकारी र सदस्य मनोनयनका निम्ति साउन १३ गते वर्तमान केन्द्रीय समितिको दोस्रो बैठक बसेको थियो । तर, बालेन टिमले नाम नदिँदा पदाधिकारी र सदस्यको मनोनयन लम्बिएको रविनिकट स्रोतको जिकिर छ ।
स्रोतका अनुसार, सरकारले विभिन्न निकायमा हालसम्म गरेका नियुक्तिका विषयमा पनि दुई नेताबीच ‘गम्भीर’ छलफल भएको थियो । केही व्यक्तिको विगतको पृष्ठभूमि विवादित रहेको तथा पटक–पटक अवसर पाउँदै आएकालाई पनि पुनः जिम्मेवारी दिइएको विषयमा कुराकानी भएको हो ।
