नेपाल अर्बुद रोग निवारण संस्थाको ४४औँ वार्षिक उत्सव समारोह सम्पन्न भएको छ। क्यान्सर रोगको रोकथाम, नियन्त्रण तथा जनचेतना अभिवृद्धिमा संस्थाले पुर्याउँदै आएको योगदानलाई स्मरण गर्दै विविध कार्यक्रमसहित वार्षिक उत्सव मनाइएको हो।
समारोहमा संस्थाका पदाधिकारी, सदस्य, स्वास्थ्यकर्मी, विभिन्न क्षेत्रका प्रतिनिधि तथा शुभेच्छुकहरूको सहभागिता रहेको थियो। कार्यक्रममा क्यान्सर रोगको जोखिम न्यूनीकरण, समयमै पहिचान तथा उपचारका लागि जनचेतना विस्तार गर्नुपर्नेमा जोड दिइएको थियो।
संस्थाले स्थापना कालदेखि नै नेपालमा क्यान्सर रोगसम्बन्धी जनचेतना फैलाउने, रोगको रोकथाम तथा नियन्त्रणका लागि अभियान सञ्चालन गर्ने र क्यान्सर प्रभावित तथा जोखिममा रहेका समुदायलाई सहयोग गर्ने कार्य गर्दै आएको जनाएको छ।
वार्षिक उत्सवका अवसरमा संस्थाको विगतको योगदानको समीक्षा गर्दै आगामी दिनमा क्यान्सरविरुद्धको अभियानलाई थप प्रभावकारी र देशव्यापी बनाउने प्रतिबद्धता समेत व्यक्त गरिएको थियो।
