खोटाङको हलेसी तुवाचुङ नगरपालिकाले टोलबस्तिमा एकीकृत सेवा विस्तारलाई जोड दिएको छ । सार्वजनिक सेवामा नागरिकको सहज पहुँच पु¥याउने उद्देश्यले नगरपालिकाका विभिन्न ठाँउमा एकीकृत सेवा दिने कार्यालय नै सञ्चालन गर्न थालेको हो ।
बुधबार हलेसी तुवाचुङ नगरपालिका वडा नं. ६, मंगलटारको सेवा क्षेत्र विस्तार गरी वडा कार्यलयबाट हुने सबै सेवा प्रवाह साविकको वडा ४ र ५ को सिमा भदौरेबाट दिन थालिएको छ । एकीकृत सेवा अन्तर्गत स्थानीय लालबहादुर आलेमगरको नाता प्रमाणित प्रमाण पत्र वितरण गर्दै सेवा त्यहाँको सेवा सुरु गरिएको छ ।
भौगलिक हिसावले विकटमा रहेको वडाको गाँउ बस्तिहरूमा एकीकृत सेवा क्षेत्र विस्तार गरेर सेवा प्रवाह गर्न थालिएको हलेसी तुवाचुङ नगरपालिकाका प्रमुख ईवन राईले जानकारी दिए । संघियताको मर्म अनुसार जनतामा विकास र परिवर्तनको आभास दिलाउन आफुहरु लागि परेको उनले बताए ।
घरगाउँमै एकीकृत सेवा पाएपछि स्थानीय खुसी भएका छन् ।
सिंहदरबारको अधिकार गाँउ गाउँमा पु¥याउने भन्दै संघियता पश्चात अधिकार सम्पन्न स्थानीय तह गठन भएपनि अधिकांश नागरिकलाई आफ्नो स्थानीय सरकारको सेवा लिन विगतमा सिंहदरबारको सेवा लिएजत्तिकै कठिन छ । विशेषत भौगोलिक विकटता भएका क्षेत्रमा वडा कार्यालय सम्म पुग्न घण्टौं यात्रा गर्नुपर्ने अझ पालिका सम्म पुगेर सेवा लिँदा २ दिनको समय छुट्याउनुपर्ने बाध्यता पनि छ ।
