खोटाङ।कोरोना भाइरस कोभिड १९ का कारण बन्द गरिएको खोटाङको हलेसी मन्दिर आठ महिनापछि खुला गरिएको छ । गत चैत ८ देखि प्रवेश रोक लगाइएको हलेसी मन्दिर मंसिर १६ गतेबाट प्रवेश खुला गरिएको हो ।
कोरोना फैलिन सक्ने खतरालाई ध्यानमा राखेर दर्शन गर्न आएका दर्शनार्थीको पुजाआजा नरोकिने गरी हलेसी तुवाचुङ नगरपालिकाले महादेवस्थान रहेको मुख्य गुफा र बसाहा गुफा प्रवेशमा रोक लगाएको थियो ।
हलेसी तुवाचुङ नगरपालिकाका प्रमुख इवन राईले मंगलबार जारी गरेको सूचनामा मूल गेटबाट एक पटकमा १० जना दर्शनार्थी मात्र मन्दिरभित्र प्रवेश गराइने, मन्दिर प्रवेशका क्रममा भक्तजनले अनिवार्य मास्क प्रयोग गर्नुपर्ने र अनिवार्य भौतिक दुरी कायम गर्नुपर्ने, मन्दिरको भित्री परिसरमा फूल, अक्षता, अगरवत्ती जस्ता पूजाका सामग्री लैजान नपाइने उल्लेख छ ।
