गोरखा उत्तरी गोरखाको दुर्गम भेगमा खटिएका म्यादी प्रहरी बिरामी भएपछि सरकारले हेलिकोप्टरबाट उद्धार गरी काठमाडौं पुर्याएको छ। चुमनुब्री गाउँपालिका ३ पाङसिङ आधारभूत विद्यालयमा खटिएका म्यादी प्रहरी धार्चे ३ खोर्लाका बेलबहादुर घले बिरामी भएपछि थप उपचारका लागि हेलिकोप्टरबाट काठमाडौं लगिएको प्रहरी उपरीक्षक केदार खनालले जानकारी दिए ।
आइतबार कार्यस्थल पुगेका घलेलाई सोमबार बिहानदेखि पेटसम्बन्धी समस्या देखिएको थियो। उनलाई उपचारका लागि प्राथमिक स्वास्थ्य केन्द्र फिलिम लगिएको तर निको नभएपछि थप उपचारका लागि हेलिकोप्टरबाट काठमाडौं पठाइएको एसपी खनालले बताए ।
गृहमन्त्रालयसँगको समन्वयमा नेपाली सेनाको हेलिकोप्टरबाट म्यादी प्रहरीको तत्काल उद्धार भएको उनले बताए । ‘हामीले गृहमा जानकारी गरायौँ, अहिले उपचारका लागि काठमाडौं लगिएको छ,ु उनले भने ।
५१ वर्षीय घले निर्वाचन सामग्रीसहित टोलीसँग आइतबार मतदान केन्द्र पुगेका थिए । बिहानदेखि पेट दुख्ने समस्या भएपछि काठमाडौंबाट विषेशज्ञ चिकित्सकले भिडियो कन्फरेन्स गरेर बिरामीको अवस्था बुझेका थिए । सिर्दिबासमा उपचार सम्भव नभएपछि उपचारका लागि नेपाली सेनाको हेलिकप्टरबाट उद्धार गरिएको चुमनुब्री गाउँपालिकाका प्रमुख प्रशासकीय अधिकृत भीमसेन श्रेष्ठले बताए ।
उत्तरी गोरखाको चुमनुब्री गाउँपालिका तिब्बतसँग सिमाना जोडिएको पालिका हो । त्यहाँ अहिलेसम्म सडक सञ्जाल पुगेको छैन । दुर्गम भएकै कारण बिरामी हुँदा स्थानीयले हेलिकोप्टरको भर पर्नुपर्ने बाध्यता छ ।
