काठमाडौं । नेकपा माओवादी केन्द्रका प्रवक्ता कृष्णबहादुर महराले अर्थमन्त्रीमा जनार्दन शर्मा फर्किने बताएका छन् । शर्मामाथिको आरोप प्रमाणित नभएकाले पुनः उनी मन्त्री नियुक्त हुन लागेको महराले बताए ।
प्रेस सेन्टर नेपालका पदाधिकारीलाई प्रमाणपत्र वितरणपछि बाहिरिने क्रममा उनले पत्रकारहरुसँग भने, ‘उहाँलाई नै आरोप लागेको थियो । तर पुष्टि भएन । त्यही भएर उहाँ नै जाँदै हुनुहुन्छ ।’
महराले छानबिन समितिबाट कुनै पनि आरोप प्रमाणित गर्ने तथ्य नभेटिएकाले यो सम्भव भएको बताए । छानबिन समितिमा रहेका एमाले सांसदप्रति लक्षित गर्दै महराले भने ‘अस्वीकार गरेपनि उहाँहरुले प्रमाण देखाउन सक्नुभएन । त्यही भएर अर्थमन्त्रीमा पुनः शर्मा जाँदै हुनुहुन्छ ।’
