भक्तपुर । काठमाडौंको कागेश्वरी मनोहरा नगरपालिकाका मेयर, उपमेयर, वडा अध्यक्षलगायतको टोलीले शुक्रबार भक्तपुरको एभरेष्ट इङ्गलिस स्कुलको अवलोकन भ्रमण गरेको छ।
नगर प्रमुख उपेन्द्र कार्की, उपप्रमुख शान्ति थापा, नगरपालिका क्षेत्रको वडा नं १ देखि ९ सम्मका वडा अध्यक्षहरू तथा नगर क्षेत्रका स्कुलका प्रिन्सिपलहरूको टोलीले भक्तपुर नगरपालिकाको एभरेष्ट स्कुलको अवलोकन भ्रमण गरेको हो।
टोलीले स्कुलको शिशु कक्षादेखि कक्षा १० सम्मका कक्षाकोठा, लाइब्रेरी, कम्प्युटर ल्याब, संगीत कक्ष, फोहोरमैला प्रशोधन लगायतका विषयहरूको अवलोकन भ्रमण गरेको थियो। साथै अवलोकन भ्रमणपछि विद्यालयका विविध विषयमा स्कुलका प्रिन्सिपलसँग जानकारी लिएका थिए।
अवलोकन भ्रमणपछि नगरपालिकाका प्रमुख उपेन्द्र कार्कीले शिक्षा, स्वास्थ्य, सरसफाई लगायतका क्षेत्रमा भक्तपुर नमूना नगर भएको भन्दै भक्तपुर नगरपालिकाको प्रशंसा गरेका छन्।
कागेश्वरी मनोहराको शैक्षिक गुणस्तर वृद्धिकालागि जनप्रतिनिधिले शैक्षिक संस्थाको अवलोकन गरेको नगर प्रमुख कार्कीले जानकारी दिए । उनले भक्तपुर नगरपालिकाले गरेको कामको हामी सबैले प्रशंसा मात्रै भएर, अनुकरण पनि गर्नुपर्ने बताए ।
