काभ्रे । भैंसीको पाडापाडीको जन्मदर्ता गराउने अभियान पनौती नगरपालिकाले सुरु गरेको छ । स्थानीयहरूको घरमा जन्मिएको पाडापाडीको जन्मदर्ता बनाउने र जन्मदर्ता बनिसकेपछि भैंसीधनिलाई सुत्केरी स्याहार भत्ता नगरपालिकाले दिने गरेको छ ।
आर्थिक वर्ष २०७६/०७७ बाट भैंसी सुत्केरी भत्ता तथा जन्मदर्ता कार्यक्रम नगरपालिकाले ल्याएको थियो । कार्यक्रम ल्याएको पहिलो वर्ष भने लगभग ६ लाख रुपैयाँ सुत्केरी भत्ता प्रदान गरेको पनौती नगरपालिकाका कृषि शाखा प्रमुख लिलानाथ सापकोटाले बताए ।
उक्त रकम लिने किसानको सङ्ख्या हरेक वर्ष बढ्दै गएको छ । आर्थिक वर्ष २०७८/०७९ मा मात्रै भैंसी सुत्केरी स्याहार भत्तामा नगरपालिकाले ४० लाख रुपैया भन्दा बढी खर्च गरेको उनले बताए ।
भैंसी पहिलो बेत व्याउँदा पाँच हजार रुपैयाँ र दोस्रोपछि अन्य बेत व्याउँदा प्रति बेत दुई हजार रुपैयाँ किसानलाई दिने गरेको छ ।
भैंसीको सुत्केरि भत्ता पाउनको लागि पाडापाडीको जन्मदर्ता अनिवार्य गर्नुपर्ने नगरपालिकाले जनाएको छ । त्यसको लागि भैंसी व्याएपछि माउ, बच्चा र पशुधनीको एकैठाउँमा उभिएको फोटो चाहिन्छ । नगरपालिकाले जारी गरेको प्रमाण पत्र लिनको लागि भैंसी धनी किसानको नाम, ठेगाना, सम्पर्क नम्बरसहित फारम भर्नुपर्छ ।
