काठमाडौँ। शिक्षा, विज्ञान तथा प्रविधिमन्त्री देवेन्द्र पौडेलले पुस्तकप्रति नयाँ पुस्तामा रुचि नदेखिएको बताएका छन् ।
पन्ध्रौँ पुस्तकालय दिवसको अवसरमा आयोजित कार्यक्रममा मन्त्री पौडेलले नयाँ पुस्तामा पुस्तक पढ्ने रुचि हराउँदै गएको बताएका हुन् ।
युवाहरूमा पुस्तक एवम् पत्रपत्रिका पढ्ने रुचि हराउँदै गएको बताउँदै उनले मोबाइलमा आउने शीर्षक हेरेर धारणा बनाउने चलन सुरु भएको बताए ।
‘लेखकले लेखेको कविता, उपन्यास र कथा पढ्नेतिर पछिल्लो पुस्तामा चाहना हराउँदै गयो,’ उनले भने ,’ ‘त्यसले सामाजिक समवेदना र जिम्मेवारी बोध, संस्कार र संस्कृति हराउँदै गयो ।’
यस वर्ष ‘पढौँ, पढाऔँ, निरन्तर शिक्षाका लागि पुस्तकालय जाऊँ’ भन्ने नाराका साथ शिक्षा, विज्ञान तथा प्रविधि मन्त्रालयले १५ औँ पुस्तकालय दिवस मनाएको छ ।
