जुम्ला। जुम्लाको सिंजा गाउँपालिकामा आधारभूत स्वास्थ्य केन्द्रमा प्रसुतिगृह सञ्चालनमा आएको छ ।
गाउँपालिका अध्यक्ष पूर्णप्रसाद धितालले ‘शुन्य घर सुत्केरी’ अभियान अन्तर्गत संविधान दिवसको अवसरमा आधारभुत स्वास्थ्य केन्द्रमा थप सेवा विस्तार गरी प्रसुतिगृह स्थापना गरिएको बताए । उनले भने, ‘अब यहाँका आमहरूले बर्थिङका लागि अन्यत्र जानुपर्दैन’। ‘घरमै सुत्केरी हुन पर्ने समस्या अब निर्मुल हुन्छ’ उनले थपे ।
प्रसुती गृहका लागि आवश्यक दक्ष जनशक्ति एसबिए तालिम प्राप्त दक्ष जनशक्ति एक जना, अहेव दुई जना, अनमी दुई जना र सहयोगी एक जना गरी अहिले ६ जना जनशक्तिको व्यवस्थापन गरिएको अध्यक्ष धितालले बताए ।
गाउँपालिका अध्यक्ष धितालले नीति तथा कार्यक्रममा मुख्य स्वास्थ्य, शिक्षा र पूर्वाधारलाई मुख्य प्राथमिकता दिएको र सोही अनुरूप काम हुने बताए। उनले गाउँपालिकालाई भ्रष्टाचार मुक्त बनाउने दाबी गरे।
