काठमाडौं । काठमाडौंको कागेश्वरी मनोहरा नगरपालिकाले जेष्ठ नागरिकलाई दशैं खर्च दिने भएको छ । नगरपालिका भित्रका सबै जेष्ठ नागरिकलाई चाडपर्व खर्चस्वरुप नगरपालिकाले जनहि एक हजार रकम दिने भएको हो ।
जेष्ठ नागरिकहरुका लागि सरकार नै अभिभावक भएकाले नगरपालिकाले अभिभावकत्व दिएर सेवा र सहयोगका कार्यक्रम ल्याएको नगरप्रमुख उपेन्द्र कार्कीले बताए । नगरप्रमुख कार्कीले घरघरमा पुगेर जेष्ठ नागरिकलाई निःशुल्क स्वास्थ्य उपचार दिने नीतिगत कार्यक्रम लागू गरेको र राज्यले दिने सामाजिक सुरक्षा भक्तामा थप एक हजार बढाएर नगरपालिकाले जेष्ठ नागरिकलाई पर्व बनाउने खर्च दिइने बताए । ‘पाकापुस्ताका बुबा आमाको सहारा भनेकै सरकार हो । मैले चुनाव अभियानमा पनि उहाँहरुलाई विशेष नीति ल्याएरै सम्बोधन गर्छु भनेको थिएँ । अहिले काम पनि गरिरहेकै छु ।’ अनलाइन सरोकारसँग नगरप्रमुख कार्कीले भने, ‘सबै उमेरका नागरबासीले अपनत्व लिने गरि नगरपालिकाले काम गर्छ । लक्षित वर्ग विशेष कार्यक्रममा बढी जोड दिन्छौं ।’ उनका अनुसार नगरपालिकाले जेष्ठ नागरिकका लागि निःशूल्क घरघरमै स्वास्थ्य परीक्षणको पनि व्यवस्था मिलाएको छ । यसबाहेक विशेषज्ञ सेवा कम्तिमा वर्षमा एक पटक पाउने गरी विशेषज्ञ सेवा सहितको स्वास्थ्य शिविर संचालन गर्ने तयारी गरेको छ ।
कागेश्वरीमा मेयरसँग जेष्ठनागरिक घरदैलो निशूल्क विशेषज्ञ स्वास्थ्य शिविर कार्यक्रम अन्तगर्त सबै वडाका जेष्ठ नागरिकहरुको स्वास्थ्य चेकजाँचका लागि वडानम्बर–९बाट अभियान थालिएको छ ।
नगरपालिकाले जेष्ठ नागरिकलाई खाजा, जेष्ठ नागरिक भवन तथा जेष्ठनागरिक पार्कका लागि पनि गृहकार्य सुरु गरेको छ ।
नगरपालिकामा प्रमुख उपेन्द्र कार्कीले कार्यभार सम्हालेको सय दिनमा गरेका कामको विवरण समेत सार्वजनिक गरिसकेका छन् ।