ओखलढुंगा । ओखलढुंगा प्रदेशसभा ‘ख’ मा एमालेका उम्मेदवार ज्ञानबहादुर खड्का जिवीले आफु जित नजिक रहेको बताएका छन् । चुनावी प्रचारप्रसारका कार्यक्रम सुरु नहुँदै माहोल उनको पक्षमा रहेको दावी गरेका हुन् ।
एमाले एक ढिक्का हुनु र गठबन्धनबाट कांग्रेसको उम्मेदवार नभइ माओवादीको उम्मेदवार बन्नुले खड्का सहज जित निकाल्ने दाउमा छन् ।
यो क्षेत्रमा एमालेको बलियो उपस्थिती छ । यद्यपी निर्वाचन क्षेत्रका ४ वटै स्थानीय तहका प्रमुख कांग्रेसले जितेको छ । स्थानीय निर्वाचनमा मानेभञ्ज्याङमा स्वतन्त्रलाई कांग्रेसको समर्थन थियो । त्यहाँ अध्यक्ष स्वतन्त्र र उपाध्यक्ष कांग्रेसले जितेको थियो । एमाले केन्द्रीय सदस्य किशोर अधिकारीको गृह पालिका मानेभञ्ज्याङमा विगतको भन्दा एमालेको संगठन बलियो बनेको छ । संगठन नै नभएको मोली एमालेमय बनेको छ भने उँबुमा स्थानीय निर्वाचनमै एमालेले जितेको छ । अन्य वडामा कांग्रेससँग एमालेको हाराहारी मत छ ।
स्थानीय निर्वाचनमा सुनकोशीमा अध्यक्ष उपाध्यक्ष दुवै कांग्रेसले जितेको छ तर वडामा एमाले बराबरीमा छ । १० वटा वडामध्ये एमालेले ५ र कांग्रेसले ५ वटा वडा जितेको छ । स्थानीय चुनावबाट कांग्रेसले नेतृत्व गरेपनि यो जिवी खड्काको गृह पालिका हो । यहाँ उनेको पक्कड छ । यो क्षेत्र उनी २०७४ को निर्वाचनमै उम्मेदवार भएर चुनाव लडेको ठाउँ पनि हो । कांग्रेसको उम्मेदवार नभएकाले सुनकोशीको अधिक भोट आफुलाई आउने खड्काको आँकलन छ ।
चम्पादेवी अध्यक्ष कांग्रेस र उपाध्यक्ष एमालेले जितेको ठाउँ हो । चम्पादेवीमा विगतको भन्दा एमालेको उपस्थिती बाक्लो छ । जिवी खड्कालाई प्रदेश सांसद बनाउन उम्मेदवार प्रस्ताव गर्ने चम्पादेवी एमाले पालिका कमिटी गठबन्धनको भन्दा बढी भोट दिने तयारीमा छ ।
लिखु एमालेको गढ हो । स्थानीय निर्वाचनमा एमालेका उम्मेदवार विरुद्ध मुद्दा परेपछि अध्यक्ष पद कांग्रेसले जितेको छ । अधिकांश वडा र उपाध्यक्षमा एमालेले जितेको छ ।
यसक्षेत्रका एमालेका प्रभावशाली नेताहरुले एक भएर एमाले जिताउने अभियानमा लाग्ने प्रण गरेका छन् ।
एमालेका नानीबाबु बुढाथोकी टिकटका दावेदार थिए । टिकट नपाएपछि उनको पक्षका मत तान्ने कांग्रेस–माओवादी गठबन्धनको रणनीति थियो । तर बुढाथोकीले आफु निकट सबै नेता कार्यकर्तालाई एमालेको पक्षमा उभिन र पार्टीका उम्मेदवारलाई जिताउन लाग्न अपिल गरिसकेका छन् ।
खड्काले ५ वर्षभित्र आफ्नो क्षेत्रलाई विकसित निर्वाचन क्षेत्रका रुपमा स्थापित गर्ने योजना अघि सारेका छन् ।
यस्ता छन् जिवी खड्काका चुनावी ऐजेण्डा (हेर्नुहोस् भिडियो अन्तरवार्ता)
४ वटै पालिकाका जम्मा २ वटा मात्रै वडा जितेको माओवादीका बाबुराम गौतम गठबन्धनका उम्मेदवार छन् । उनी राजनितीमा लामो समय देखि सकृय भएपनि आफ्नो पार्टीको चुनाव जित्न पुग्ने भोट छैन । उनलाई चुनाव जित्न सबै कांग्रेसका नेता कार्यकर्ताले मतदान गर्नुपर्ने अवस्था छ । द्धोन्द्धकालिन घटनाका माओवादी पीडित परिवार र असन्तुष्ट कांग्रेसलाई मिलाउन उनलाई चुनौती छ ।
एमाले भित्रको असन्तुष्टिलाई उनले क्याँस गर्नसक्ने परिस्थिती छैन । अझ टिकट खोसिएका कांग्रेस नेताले समेत गठबन्धनलाई साथ नदिने सम्भावना छ ।
हार वा जित चुनावी मतपरिणाम आएपछि यकिन हुनेभएपनि अहिलेको माहोल भने जिवी खड्काको पक्षमा देखिएकाे एमाले नेता सन्ताेष बस्नेतले बताए ।
एमाले यो क्षेत्रमा पहिलो पटक जितेर इतिहास रच्ने योजनामा छ ।
२०६४ मा माओवादीका तत्कालिन नेता बालकृष्ण ढुंगेलले जितेर कम्युनिष्टको विजयी सुरुवात गरेको यो क्षेत्रमा २०७० मा कांग्रेसका रामहरि खतिवडाले जितेका थिए । २०७४ मा वामगठबन्धनका मोहन खड्का निर्वाचित भएका थिए । यो पटक जिवी खड्काले जिते पहिलोपटक एमालेले जित्ने छ । बाबुराम गौतमले जिते माओवादीको जित तेस्रो पटक हुनेछ ।
