च्यानम । कांग्रेस माओवादी गठबन्धन अपवित्र भन्दै ओखलढुंगा कांग्रेसका नेता कार्यकर्ताले पार्टी त्यागेका छन् । कांग्रेस विधि अनुसार नचलेको र भागबन्डा गरेर सिद्वान्त नमिल्नेहरुसँग तालमेल गरेको भन्दै कांग्रेसका पुराना नेताहरुले पार्टी त्यागेका हुन् ।
च्यानमका पूर्वसभापति भुपध्वज कट्वालको नेतृत्वमा कांग्रेस र माओवादी परित्याग गरि आज ५४ जना नेकपा (एमाले) मा प्रवेश गरेका छन् । नवप्रवेशीलाई एमाले केन्द्रीय सदस्य तथा प्रतिनिधिसभाका उम्मेदवार यज्ञराज सुनुवार, प्रदेशसभाका उम्मेदवार ज्ञानबहादुर खड्का जिवी, केन्द्रीय सदस्य किशोर अधिकारी, पार्टी अध्यक्ष शंकरकट्वाललगायतले स्वागत गरेका थिए ।
प्रदेशसभामा माओवादीको उम्मेदवारलाई भोट हाल्नुपर्ने भएकाले भागबन्डाको राजनीतिले जिल्लाको विकास र मुलुकको निकास नदिने भएर पार्टी परित्याग गरेको नेता भुपध्वज कट्वालले बताए ।
आफुहरुले विद्रोह गरेझैं अरु कांग्रेस कार्यकर्ताले गठबन्धनलाई पार्टीमै बसेर पनि भोट नदिने बताए ।
च्यानममा डेढ सयलाई प्रवेश गराउने एमालेको लक्ष्य रहेको युवा संघ नेता सन्तोष बस्नेतले बताए ।
