खाेटाङ । खोटाङको हलेसी तुवाचुङ नगरपालिकाका नगरप्रमुख विमला राई नगरपालिकाको सेवा लिएर यतिबेला नगरभित्रका गाउँटोलमा पुगिरहकी छन् । नगरबासीका माग र आवश्यकता बुझ्दै मेयर राई सार्वजनिक सेवा लिएर गाउँगाउँमा पुगेकी हुन् ।
नगरपालिकाले नागरिकलाई वडामै पुगेर सामाजिक सुरक्षाभत्ता वितरणदेखि योजना सम्झौतासम्मका सेवा दिने अभियान थालनी गरेको छ । नगरपालिकाका जनप्रतिनिधि र कर्मचारीको उपस्थितिमा वडागत योजना सम्झौता, ज्येष्ठ नागरिकको निःशुल्क स्वास्थ्य परीक्षण, बालिका विकास बचत भौचर हस्तान्तरण र ज्येष्ठ नागरिक तथा अपाङ्गता भएका व्यक्तिलाई परिचयपत्र वितरण गर्न नगरपालिकाले अभियान सञ्चालन गरेको हो ।
नगरवासी नागरिकको सहजताका लागि नगरपालिकाले सुरु गरेको अभियानको पहिलो दिन सोमबार वडा नं ११ राजापानीस्थित वडा कार्यालयमा पुगेर सेवा प्रदान गरेको छ । राजापानीको वडा कार्यालयमा सञ्चालन गरिएको एकीकृत घुम्ती शिविरमा १५ वटा योजना सम्झौता गरिएको छ ।
शिविरमा नगरपालिकाले सञ्चालन गरिरहेको बालिका बचत कार्यक्रमअन्तर्गत बैंकमा रकम जम्मा गरेर १० जनालाई भौचर हस्तान्तरण गरिएको जनाइएको छ । यस्तै दुई सय ज्येष्ठ नागरिकको स्वास्थ्य परीक्षणसँगै औषधि वितरण गरिएको छ । शिविरमा एक सय ५० जनाले सामाजिक सुरक्षा भत्ता बुझेका छन् । (क) वर्गका एक, (ख) वर्गका चार, (ग) वर्गका दुई र (घ) वर्गका एक गरी ८ जनालाई अपाङ्गता परिचयपत्र र ३० ज्येष्ठ नागरिकलाई परिचयपत्र प्रदान गरिएको नगरपालिकाले जनाएको छ ।
सामाजिक सुरक्षा भत्ता बुझ्न वृद्धवृद्धा लठ्ठीको सहारामा वडा कार्यालय आएका थिए । हलेसी तुवाचुङमा सामाजिक सुरक्षा भत्ता बैंकिङ प्रणालीबाट वितरण सुरु भएपछि भत्ता बुझ्न बैंकसम्म पुग्नुपर्ने बाध्यता छ । राजापानीबाट हलेसीसम्म पुगेर फर्किँदा भत्ताको आधा रकम सकिएको सुनाउँदै हाल वडामै भत्ता पाउँदा धेरै खुसी लागेको वृद्धवृद्धाले प्रतिक्रिया दिएका छन् । वडासम्म आउन नसक्ने व्यक्तिको भत्ता परिवारका सदस्यलाई प्रदान गरिएको छ ।
यस्तै योजना सम्झौता गर्न नगरपालिकाको कार्यालयमा धाउँदा धेरै खर्च हुने गरेको उपभोक्ताको गुनासोलाई मध्यनजर गर्दै वडामै सम्झौता गर्न थालिएको छ । वडागत योजना सम्झौतादेखि ज्येष्ठ नागरिकको स्वास्थ्य परीक्षण र ज्येष्ठ नागरिक तथा अपाङ्गता भएका व्यक्तिलाई वडामै पुगेर परिचयपत्र वितरण गर्न पाउँदा आफूहरूसमेत सन्तुष्ट भएको जनप्रतिनिधिले बताएका छन् ।
नागरिकलाई स्थानीय सरकारको अनुभूति दिलाउन वडामै पुगेर सेवा प्रदान गर्ने उद्देश्यले एकीकृत घुम्ती शिविर सञ्चालन अभियान सुरु गरिएको नगरप्रमुख विमला राईले बताइन् । ‘विशेषगरी सामाजिक सुरक्षा भत्ता लिने नागरिकलाई समस्या छ । भत्ता लिन हलेसी पुग्नुपर्छ । सवारीसाधन प्रयोग गरेर जाँदा आधा रकम उतै सकिने अवस्था छ’, उनले भने, ‘त्यसैले वडामै पुगेर भत्ता वितरण गर्न थालेका छौँ । वडाका योजना साना छन् । सम्झौताका लागि नगरपालिका पुग्नुपर्ने उपभोक्ताको बाध्यता छ । उनीहरूको समय र स्रोतको बचत गर्न शिविरमार्फत सेवा दिन थालेका हौँ ।’
वडा कार्यालय आएका कतिपय सेवाग्राहीको कागजपत्र नमिलेका कारण रित्तो हातसमेत फर्किका छन् । विशेषगरी सामाजिक सुरक्षा भत्ता लिने सेवाग्राहीमा समस्या देखिएकाले त्यस्ता व्यक्तिको कागजपत्र मिलाएर पुनः उनीहरूलाई सहज वातावरणमा सेवा प्रदान गरिने वडाध्यक्ष अनिश कार्कीले बताए ।
अभियानका क्रममा साविकको राजापानी गाविस वडा १ थुम्कीका लोकबहादुर बुढाथोकीलाई उहाँको घरमै पुगेर अपाङ्गता परिचयपत्र प्रदान गरिएको छ । करिब एक वर्षदेखि प्यारालाइसिस रोगले ओछ्यान परेकाे बुढाथोकीलाई उपप्रमुख रमेशकुमार राउत, वडाध्यक्ष अनिश कार्की, नगर स्वास्थ्य शाखा संयोजक प्रकाश घिमिरेलगायतको टोलीले परिचयपत्र प्रदान गरेको हो ।
