धनकुटाको छथरजोपाटी गाउँपालिकाले पालिकाभित्रका गरिब घरपरिवारलाई परिचयपत्र वितरण गर्न सुरू गरेको छ । गाउँपालिकाले गरिब घरपरिवारलाई पहिचानको विवरणमा समावेश भएर परिचयपत्र स्वीकृत भएका परिवारलाई परिचयपत्र वितरण गर्न सुरू गरेको हो ।
केही वर्ष पहिला फारम भरेकाहरुको परिचयपत्र भूमी व्यवस्था सहकारी तथा गरिबी निवारण मन्त्रालयमा पठाएपछि गाउँपालिकाले वितरण गर्न सुरु गरेको हो ।
आर्थिक रुपलेपछि परेका नागरिकहरुको पहिचान गरी शिक्षा, स्वाथ्य र रोजगारी लगायत अवसरमा प्राथमिकता दिनका लागि गाउँपालिकाले यो अभियानको सुरू गरेको हो । सामाजिक कल्याणका काममा गरीब घरपरिवारलाई विशेष प्राथमिकता राज्यले सेवा सुविद्या दिनका लागि परिचयपत्र वितरण गर्ने सरकारको लक्ष्य हुन सक्ने गाउँपालिकाका अध्यक्ष छत्रबहादुर सुब्बाले बताए ।
गाउँपालिकाका ६ वटा वडाका २ सय ४५ परिवारलाई गरीब घर पहिचानको परिचयपत्र दिइने गाउँपालिकाका प्रमुख प्रशासकीय अधिकृत जितमान जिमीले जानकारी दिए ।
