काठमाडौं । लोकपप ब्याण्ड नेपथ्यले अष्ट्रेलियाको सिड्नीस्थित होर्डन पभिलियनमा भव्य कन्सर्ट गरेको छ । कन्सर्टमा पाँच हजारभन्दा बढी दर्शक उपस्थित थिए ।
कन्सर्टबारे नेपालयका किरणकृष्ण श्रेष्ठले भने, ‘तीन वर्षअघि सिड्नी कन्सर्टका बेला सम्पूर्ण टिकट इन्टरनेटबाटै बिक्री भएको देखेर मैले नेपाली संगीतमा नयाँ युग उदाएको महसुस गरेको थिएँ । यसपालि अघिल्लो दिन नै हाउसफुलको सूचना आइसकेको थियो ।’
प्रत्येक कन्सर्टमा नयाँ मानक प्रस्तुत गर्ने नेपथ्यप्रेमीले यसपटक पनि यो लोकप्रिय ब्याण्डसँगै रमाए । कतिपय गीतमा त मञ्चमा गाएको आवाजभन्दा तल श्रोताले गाएको आवाजको मात्रा चर्को सुनिन्थ्यो । ‘रेशम’ गाउँदा साथमा नगाएको कोही देखिंदैन थिए भने ‘तालको पानी’ र ‘मैं नाचें छमछमी’ गाउँदा नहल्लिएर बसेको कोही देखिंदैन थिए ।
ब्याण्डले उसको स्थापनाकै पहिलो सिर्जना ‘आँगनैभरि’ बाट कन्सर्टको थालनी गरेको थियो । त्यो गीतमा दर्शकको एकाकार आवाजले भव्य ‘कोरस’को सिर्जना गरेको देखिन्थ्यो । यो क्रमले ‘छेक्यो छेक्यो’ हुँदै अन्तिमको ‘रातो र चन्द्रसूर्र्य’सम्मै नयाँ पुराना सबै गीतमा निरन्तरता पाएको थियो ।
प्रस्तुतिलाई विशेष बनाउन सदावहार र नयाँ गीतको सन्तुलित चयन मात्र नभई प्राविधिक हिसाबबाट पनि अझ जोड दिइएको थियो । अष्ट्रेलियामा १३ सदस्यीय कलाकार, प्राविधिज्ञ र व्यवस्थापकको नेपथ्य टोलीले यात्रा गरिरहेको छ । अष्ट्रेलियाको व्यावसायिक राजधानी सिड्नीमा यो कन्सर्टले नेपथ्यको टुरलाई सफल बनाएको अनुमान गरिएको छ ।
नेपाली समुदायको उच्च बसोबास रहेको सिड्नीमा नेपथ्यले सन् २००९ मा आफूलाई पहिलोपटक प्रस्तुत गरेको थियो । त्यतिबेला एक विश्वविद्यालयको हलमा १२ सय दर्शक मात्र उपस्थित थिए । त्यसयता ब्याण्डले यो विशाल टापुरुपी मुलुकमा पाँचपटक यात्रा गरिसकेको छ ।
त्यसमध्ये सन् २०१२ विशेष उल्लेखनीय थियो, जतिबेला २२ सय क्षमताको सिड्नी टाउनहलमा दर्शक नअटाएर बाहिर रहन पुगेको भीडले निकै बेरसम्म ट्राफिक अस्तव्यस्त पारिदिएको थियो ।
त्यसपछि सन् २०१५ यता लुनापार्कको अडिटोरियममा बारम्बार प्रस्तुत भएको नेपथ्यले यसपालि पाँच हजारभन्दा बढी दर्शक अटाउने ‘होडर्न पभिलियन’मा फड्को मारेको हो ।
गायक अमृत गुरुङले कन्सर्टकै बेला पनि यसरी ‘ब्रेन’ र तन्नेरीको ‘ड्रेन’ छिट्टै थामिएर नेपाल आफैंमा अवसरले भरिएको एक समृद्ध मुलुक बन्ने विश्वास प्रकट गरे । सिड्नीको कन्सर्ट सम्पन्न भएसँगै नेपथ्य अष्ट्रेलिया श्रृंखला अब मेलबर्नतर्फ लम्किएको छ ।
