मकवानपुरको बकैया गाउँपालिकाले बारीमा घाँस रोप्ने किसानलाई चामल किन्न अनुदान रकम दिनेभएको छ । व्यवसायिक पशुपालनलाई प्रोत्साहन गर्न घाँस खेति बढाउने लक्ष्यसहित गाउँपालिकाले घाँस रोप्ने किसानलाई चामल किन्ने पैसा दिने नौलो नीति अघि सारेको हो ।
कृषि र पशुपालन मार्फत किसानको आयस्रोत बढाएर पालिकालाई समृद्ध बनाउन लागि परेको गाउँपालिका अध्यक्ष धर्मराज लामिछानेले बताए । घाँसखेति प्रवद्र्धन गर्न अनुदानको व्यवस्था गरिएको उनको भनाई छ । ‘किसानहरुले परम्परागत खेति भन्दा पनि आधुनिक खेति प्रणाली अँगाल्नु पर्छ र पशुपालकले गोठ भन्दा १–२ किलो मिटर पर घाँस खेति गर्ने चलन छ । नजिकैको बारीमा घाँस खेति गर्नुस् भन्दा अन्न फलाउने बारीमा घाँस नरोप्ने भनेपछि मैले तपाईँ घाँस खेति गर्नुस् म चामल किन्ने पैसा दिन्छु भनेको छु ।’ अध्यक्ष लामिछानेले अनलाइन सरोकारसँग भने, ‘कृषि र पशुपालन मार्फत किसानको जीवनस्तर उकास्ने र पूर्वाधार विकासलाई सँगै अघि बढाएर यो कार्यकालमै बकैया गाउँपालिका समृद्धिको यात्रामा अघि बढाउने मेरो लक्ष्य छ ।’ नागरिकको आवश्यकता र मागमा केन्द्रीत भएर विज्ञसँगको परामर्शमा दिर्घकालिन महत्वका योजना अघि सारिने अध्यक्ष लामिछानेको भनाई छ ।
हेर्नुहाेस् भिडियाे :
