झापा। झापाको भद्रपुर नगरपालिकाले स्थानीय विषयवस्तु समेटेर पाठ्यक्रम तयार पारेर यसै शैक्षिक सत्रबाट नगरपालिकाभित्रमा लागू गरेको छ । स्थानीय सरकार सञ्चालन ऐन २०७४ ले दिएको अधिकार प्रयोग गरी स्थानीय जाति, भाषा, भूगोल, संस्कृति पर्यटकीय क्षेत्रको पहिचान लगायतका विषय समेटेर पाठ्यक्रम तयार गरी यस शैक्षिक वर्षबाट लागु गरेको हो ।
नगरपालिकाले चालु शैक्षिक सत्रमा कक्षा १ देखि ८ कक्षासम्म ‘भद्रपुरको सेरोफेरो’ विषयमा स्थानीय पाठ्यक्रम तयार गरेर पठन पाठन सुरु गरेको छ ।
पाठ्यक्रममा ७ वटा क्षेत्र समेटेर तयार पारिएको छ । जसमा भद्रपुरको भौगोलिक अवस्था, प्राकृतिक सौन्दर्यता, नदी, खोला, तालतलैया, मठमन्दिरहरू, धार्मिक ऐतिहासिक स्थलको परिचय, नैतिक आचरण, योग शिक्षा तथा नगरपालिकाको बारेमा विविध जानकारी समेटिएको छ ।
नगरप्रमुख गणेश पाेखरेलका अनुसार ‘स्थानीय स्रोत साधन र स्थानीय परिवेश सुहाउँदो विषयवस्तु समेटेर पाठ्यक्रम तयार गरेका हो ।’ यस वर्ष पाठ्यक्रम मात्र लागु गरिएको भन्दै पाेखरेलले आगामी शैक्षिक वर्षबाट भने पाठ्यपुस्तक समेत तयार पारेर पठाइने जानकारी दिए ।
पाेखरेलले केन्द्रीय पाठ्यक्रमले नसमेटेका विषयसँगै नीति शिक्षा, जीवन उपयोगी शिक्षा, धार्मिक ऐतिहासिक, सांस्कृतिक र भौगोलिक पहिचान, पर्यटकीय स्थल जस्ता विषयहरू पाठ्यक्रममा समावेश गरिएको बताए ।
