जैमिनी नगरपालिकाले जिल्ला स्तरीय न्यायिक समितिको प्रथम सम्मेलन आयोजना गर्ने भएको छ । यसैवर्ष बाग्लुङ जिल्ला स्तरीय न्यायिक समितिको प्रथम सम्मेलन जैमिनी नगरपालिकाको न्यायिक समितिको नेतृत्वमा जिल्लास्तरीय सम्मेलन हुने भएको हो ।
जिल्लाभित्रका स्थानिय तहको न्यायसम्पादनलाई थप प्रभावकारी बनाउने र समितिहरुका बीचमा सहकार्य बढाउने उद्देश्यले जिल्लास्तरीय न्यायिक समितिको सम्मेलन गर्ने योजना ल्याइएको जैमिनी नगरपालिकाका उपप्रमुख एवम् न्यायिक समिति संयोजक हरिहर शर्माले बताए ।
नगरपालिकाले जिल्लास्तरीय न्यायिक समितिको प्रथम सम्मेलन आयोजना गर्न ४ लाख बजेट विनियोजन गरेको छ ।
न्यायिक समितिहरु सबै स्थानिय सकृय रहेपनि जिल्ला स्तरमा एउटै फोरम बनाएर अघि बढ्न सकेका छैनन् ।
जैमिनीले आयोजना गर्ने न्यायिक सम्मेलनले देशभरका न्यायिक समितिहरुलाई जिल्लास्तरमा छलफल गर्न, योजना बनाउन र न्यायसम्पादन प्रभावकारी बनाउन सन्देश दिने जानकारहरु बताउँछन् ।
