गोकर्णेश्वर नगरपालिकाका मेयर दिपक रिसाल नगरबासीको स्वास्थ्य उपचारलाई सहज बनाउन लागेका छन् । नगरपालिका भित्रका अस्पतालहरुमा नगरबासीको उपचार गराउँदा छुटदिने व्यवस्थाका लागि मेयर रिसालले पहल थालेका हुन् ।
जोरपाटी नारायणटार स्थित नेपाल अर्थोपेडिक अस्पतालसहित नगरपालिकाका सबैजसो अस्पतालसँग मेयर रिसालले नगरबासीको उपचारलाई सहज बनाउने विषयमा छलफल गरेर उपचार सम्झौतासमेत गरिसकेका छन् ।
यसरी सम्झौता गरिएको अर्थोपेडिक अस्पतालमा गोकर्णेश्वर नगरपालिकाका सबै स्थायी बासिन्दाहरुले छुटसहितको सेवा लिनसक्ने मेयर रिसालको भनाई छ । उहाँका अनुसार जुनसुकै उमेर समूहका नागरिक बिरामी भई उपचार गर्नु परेमा बिरामीले ५० प्रतिशत अर्थात आधा रकम मात्र व्यहोर्नुपर्नेछ । बाँकी रकममा अस्पतालले ३० प्रतिशत छुट गर्नेछ भने नगरपालिकाले २० प्रतिशत अस्पताललाई उपलब्ध गराउने छ ।
औषधिको रकम भने बिरामी आफैले व्यहोर्नु पर्नेछ ।
यस्तो छुट बार्षिक १ लाखसम्मको उपचारमा लाग्ने रकम बराबर हुनेछ ।
तर यो सेवा लिन गोकर्णेश्वर नगरपालिकाका स्थायी बासिन्दा हुनुपर्नेछ ।
