धनुषाको मिथिला नगरपालिकाकाले अनुमानित ८० करोडको बजेट ल्याएको छ ।
सोमबार सम्पन्न नगरसभाको उद्घाटन सत्रमा नगरप्रमुख महेन्द्र महतोले चालु आर्थिक वर्ष २०८०/०८१ का लागि नीति तथा कार्यक्रमसहित अनुमानित बजेट प्रस्तुत गरेका हुन् ।
कृषि, शिक्षा, स्वास्थ्य, भौतिक पूर्वाधार, पर्यटनलगायत समेटेर अनुमानित ८० करोडको बजेट नगरप्रमुख महतोले प्रस्तुत गरेका छन् । जसमा चालुतर्फ ६२ करोड र पुँजीगततर्फ १८ करोड रुपैयाँ रहेको जनाएको छ ।
असार १० गतेसम्म नीति तथा कार्यक्रम र बजेट ल्याउनुपर्ने कानुनी व्यवस्था छ । तर नेपाली कांग्रेस र एमालेबीचको विवादले यस नगरपालिकाको नगरसभा समयमा हुन सकेको थिएन । सोमबार एमालेका बहिष्कारका बीच कांग्रेस र एकीकृत समाजवादीले मिलेर बहुमतले नगरसभा गरेका हुन् ।
मिथिला नगरपालिकामा ११ वटा वडा छ । कांग्रेसले मेयरसहित चारवटा वडा जितेको छ । एमलाेले उपमेयरसहित पाँचवटा वडा जितेको छ । एकीकृत समाजवादीले २ वटा वडा जितेको छ ।
कांग्रेसका सहमहामन्त्री तथा पूर्वमन्त्री महेन्द्र यादवको प्रमुख आतिथ्य तथा एकीकृत समाजवादीका पोलिटब्युरो सदस्यसमेत रहेका पूर्वमन्त्री सत्रुधन महतो विशिष्ट आतिथ्यमा नगरसभाको उद्घाटन सत्र सकिएको छ ।
नगरसभामा माओवादीका नेता रामकुमार महतो, कांग्रेसका गुदर यादव, माओवादीका दिनेश मण्डल, एसका जिवछ महतोलगायतले शुभकामना मन्तव्य राखेका थिए ।
नगरसभाको बन्द सत्र सोमबार नै सुरु भएको र बजेट बाँडफाँटका लागि पाँच सदस्य समितिसमेत गठन भएको नगरपालिकाले जनाएको छ ।
अब १७ गते बुधबार फेरि नगरसभा बैठक बस्ने मिथिला नगरपालिकाका प्रवक्ता रामबहादुर स्यांगदनले जानकारी दिए ।
