सुनसरीको गढी गाउँपालिकाले सडक विकासलाई प्राथमिकता दिएको छ । नयाँ सडक निर्माण र पुराना सडकको स्तरोन्नती गर्दै आएको गढीले यसवर्ष करिब २० किलोमिटर सडक कालोपत्रे गर्ने भएको हो ।
गाउँपालिकामा सडक कालोपत्रेको सुरुवात गर्न यसवर्ष १ करोड बजेट विनियोजन गरिएको छ ।
कोशी प्रदेशको राजधानीबाट नजिकै पर्ने गढीक्षेत्र अन्य स्थानीय तहको तुलनामा सडक विकासमा केही समयअघि सम्म निकै पछाडी थियो वर्तमान जनप्रतिनिधिले पालिका भित्रका सडक निर्माण, स्तरोन्नती र कालोपत्रेको कामलाई गौरवको योजनाका रुपमा अघि बढाएका छन् । विकासको मेरुदण्डका रुपमा रहेको सडकको विकासलाई पहिलो प्राथमिकतामा राखिएको गाउँपालिका अध्यक्ष आश नारायण चौधरीले अनलाइनसरोकारसँग बताए ।
बहुवर्षिय योजनाको रुपमा रहेको वडा नम्बर ६ देखि उत्तरगढी २,५ र ६ को काली मन्दिरसम्म जोड्ने मोटरबाटो कालोपत्रेको काम यसैवर्ष सकिने भएको छ । त्यसका लागि पालिकाले २ करोड रुपैंया विनियोजन गरेको छ ।
गाउँपालिकाका अन्य बाटोघाटो मर्मतका लागि २० लाख बजेट छुट्याइएको छ ।
सडक विकासलाई प्राथमिकता दिएको गढीले अन्य क्षेत्रमा पनि समानुपातिक विकासको नीति लिएको छ ।
