सिन्धुलीको तीनपाटन गाउँपालिकामा ‘सासूको इच्छा, बुहारीलाई शिक्षा’ कार्यक्रम शुरु भएको छ । पालिकाभित्रका दलित समुदायका बुहारीहरूको उच्च शिक्षामा पहुँच अभिवृद्धि गर्न यस्तो कार्यक्रम ल्याइएको हो ।
तीनपाटन गाउँपालिकाका बुहारीहरूलाई स्नातक वा सोभन्दा माथिल्लो तह अध्ययनका लागि क्याम्पसमा लाग्ने भर्ना शुल्क गाउँपालिकाबाट व्योहोर्ने गरी ‘सासूको इच्छा, बुहारीलाई शिक्षा’ नामक कार्यक्रम सञ्चालनमा ल्याइएको गाउँपालिका अध्यक्ष कर्णबहादुर मगरले बताए । विवाह पश्चात पनि बुहारीलाई अध्ययानलाई निरन्तरता दिन र समाजमा बुहारीमाथी हुने विभेद हटाउन यस्तो कार्यक्रम ल्याइएको अध्यक्ष मगरको भनाई छ ।
कार्यक्रमबाट लाभ लिनका लागि बुहारी भए सासू वा छोरी भए आमाले आफ्नी बुहारी-छोरीलाई स्नातक÷ स्नातकोत्तर तहको कुनै पनि वर्ष वा सेमेस्टरमा भर्ना गर्न स्वयंले क्याम्पसमा लैजानुपर्ने व्यवस्था गरिएको छ ।
साथै, महिला अभिभावक परिवारमा नभएमा एकासगोल परिवारभित्रका अन्य महिला नातेदारले पनि छोरी वा बुहारीलाई क्याम्पस भर्ना गर्न लैजान सक्ने व्यवस्था गरिएको छ ।
