धनकुटा नगरपालिकाले गरिबी उन्मुलन र उद्यमशिलता विकासको लक्ष्य अघि सारेको छ । गरिबीको रेखामुनी रहेका नगरबासीलाई उद्यमी बनाएर स्वरोजगार बनाउने नगरपालिकाले नीति लिएको हो ।
दिगो विकास र रुपान्तरणका अन्य अभियानसँगै गरिबीको रेखामुनी रहेका नागरिकलाई आत्मनिर्भर बनाउने लक्ष्य लिइएको नगरप्रमुख चिन्तन तामाङले बताए । धनकुटा नगरपालिका भित्र लोपोन्मुख समुदायको समेत बसोबास रहेको र त्यो समुदायमा आर्थिक रुपमा विपन्न रहेको साथै जग्गा बन्दकी राखेर दैनिकी चलाएका कारण सुकुम्बासी हुने अवस्थामा समेत पुगेकाले त्यो अवस्थाको गरिबी उन्मुलन गर्न उद्यम विकासका कार्यक्रम ल्याइको नगरप्रमुख तामाङको भनाई छ ।
धनकुटा नगरपालिकाले ६ वर्षअघि देखिनै युवा स्वरोजगार र उद्यम विकासका अभियान चलाइरहेको छ । विगतको उपलब्धि संस्थागत गर्दै बाँकी काम सम्पन्न गरेर समुन्नत र समृद्ध धनकुटा बनाउने लक्ष्य लिएपनि बजेट घटेर आएकाले सिमित स्रोतले असिमित आवश्यकता पुरा गर्नुपर्ने अवस्था रहेको नगरपालिकाले जनाएको छ ।
