ओखलढुंगाको चिशंखुगढी गाउँपालिकामा सिसाजन्य सामाग्रीको प्रयोगमा पूर्णरुपमा प्रतिबन्ध लगाईएकोे छ । कार्यपालिकाको बैठकले पालिका भित्र औषधि र अत्यावश्यक बाहेकका सिसाजन्य वस्तुहरु आयात र प्रयोगमा पूर्ण प्रतिबन्ध लगाउने निर्णय गरेको हो ।
सिसाजन्य पेय पदार्थहरुको बोतल व्यवस्थापन गर्न समस्या हुने, यसले वातावरणीय पर्यावरणमा असर पुग्ने, प्रदुषण बढ्ने र जथाभाबी फाल्नाले चोटपटकको पनि जोखिम बढेकोले सिसाजन्य बोतल तथा सामाग्री प्रतिबन्ध गरिएको गाउँपालिका अध्यक्ष निशान्त शर्माले बताए । ‘सिसाका बोत्तलले जोखिम बढाउने र सौन्दर्यता घटाउने भएकाले सिसाजन्य सामाग्रीको आयात र प्रयोगको बन्देज लगाउने कार्यपालिकाले नै निर्णय गरेको छ ।’ अध्यक्ष शर्माले भने, ‘नियमित अनुगमन हुन्छ यदि कुनै व्यापारी वा उपभोक्ताबाट निर्णय उलंघन गरेको पाइएमा तत्काल कारबाही हुन्छ ।’ सिसाजन्य सामाग्री प्रतिबन्ध गरिएकोबारे व्यापारी, व्यवसायी र आम नागरिकलाई सु–सुचित गरिएको अध्यक्ष शर्माको भनाई छ ।
जथाभावी फालिएका सिसाजन्य सामाग्री र मदिराका विज्ञापन बोर्डका कारण ओखलढुंगाका बजार क्षेत्र कुरुप छन् । बढी मानिसको आवागमन हुने पर्यटकीय क्षेत्र, जिल्ला सदरमुकामसहित मुख्य तथा सहायक व्यापारीक केन्द्र र गाउँपालिकाका केन्द्रहरुमा बढी समस्या छ ।
