बागलुङको ताराखोलाका किसान स्याउ खेतीमा आकर्षित भएका छन् । स्थानीय सरकारले उत्पादन देखि बजारीकरण सम्म सहयोग गर्ने भएपछि ताराखोलाका किसान परम्परागत खेती त्यागेर स्याउ खेतीमा जुटेका हुन् ।
ताराखोला गाउँपालिका वडा नं. ५ ठुलो हिले कृषि तथा पशुपालन समूहको अगुवाइमा मपेस र ठुले हिलेमा १ सय ८० स्याउको बिरुवा रोपिएको छ । समुद्री सतहबाट २ हजार देखी ३ हजार सम्मको उचाइमा उत्पादन राम्रो हुने भएकोले स्याउ उत्पादनमा जोड दिइएको गाउँपालिका अध्यक्ष धनबहादुर वि.कले अनलाइन सरोकारसँग बताए । पालिकाभित्र जहाँ जे फल्छ त्यहाँ त्यो खेतीलाई आधुनिक र व्यवसायिक बनाएर किसानको आयस्रोत बढाउने लक्ष्य राखिएको अध्यक्ष वि.कको भनाई छ ।
१ हजार १ सयसम्म मुल्य पर्ने एउटा स्याउको बिरुवालाई ७५ प्रतिशतको अनुदानमा २ सय ७५ का दरले किसानलाई विरुवा वितरण गरिएको छ । बिरुवा लगाएको २ देखी ३ वर्षमा फल लाग्ने र एक बिरुवा बाट २० देखी ३० केजी सम्म उत्पादन गर्न सकिन्छ । बागलुङ ताराखोला गाउँपालिका कृषकहरू अहिले स्याउखेतिमा आकर्षित बन्दै गएका छन् ।
