पाँचथरको तुम्बेवामा ‘मेरो पालिका मै बनाउँछु’ अभियान सुरु भएको छ । स्थानीय सरकारको नीति अनुरुप जनश्रमदान मार्फत नागरिक सहभागितामा विकास निर्माणका काम गर्ने गरी यो अभियान सुरु गरिएको हो ।
गाउँपालिकाको चालु आर्थिक वर्षको नीति तथा कार्यक्रमको पहिलो बुँदामा ‘मेरो पालिका मै बनाउँछु’ अभियान अन्तरगत पालिका अध्यक्षको नेतृत्वमा बृहत जनश्रमदान कार्यक्रम सञ्चालन गरिने उल्लेख छ ।
भौगोलिक हिसाबले विकट र चुनौतीपूर्ण रहेपनि स्थानीय सरकारले नागरिकका सबै माग र आवश्यकता पुरा गर्नेगरी स्रोत परिचालन र श्रमदानबाट काम गरिरहेको गाउँपालिका अध्यक्ष बाबुराम खड्काले बताए ।
तुम्बेवामा स्वास्थ्य, शिक्षा, कृषि, पूर्वाधार विकास र पर्यटन विकासका योजनालाई प्राथमिकतामा राखेर काम गरेको अध्यक्ष खड्काको भनाई छ ।
तुम्बेवा क्षेत्रलाई पर्यटकीय गन्तव्य बनाउन पदमार्ग निर्माण, पार्क निर्माण, पालिका र वडाका केन्द्रका सडकहरु ढलान गरी आसपासमा गमला राख्ने काम भईरहेको छ ।
आन्तरिक स्रोत र संघिय अनुदान सिमित रहेको तुम्बेवाले प्राप्त स्रोतको उच्चतम् सदुपयोग गरेर काम गरिरहेको छ ।