चुनावी घोषणापत्र चुनाव जित्नका लागि उम्मेदवार र सम्बिन्धत दलले जारी गर्छन् । जब चुनाव सकिन्छ एक पदमा एक व्यक्तिले जित्ने र अरु सबैले हार्ने भएकाले जित्नेको घोषणापत्र कार्यकालभर अर्थपूर्ण बन्छ । हार्नेहरुको घोषणा पत्रको हारेका दिन औचित्य सकिन्छ । तर चुनाव जितेका पनि अधिकांशले घोषणापत्रमा लेखे र चुनावी सभामा बोले जसरी जिम्मेवारीमा पुगेपछि काम गर्दैनन् भन्ने आम नागरिकको बुझाई छ ।
कालिकोटको तिलागुफाका मेयरसहितका स्थानीय जनप्रतिनिधि भने यतिबेला चुनावी घोषणापत्रमा टेकेर जनताका माग पुरा गर्न लागिपरेका छन् । स्थानीय निर्वाचनमा जारी गरेको घोषणापत्र र चुनावी मैदानमा हुँदा जनताका बीचमा गरेका वाचा अनुसार स्थानीय आवश्यकता पहिचान गरेर तिलागुफाका जनप्रतिनिधिले नीतिगत रुपमै काम गर्न थालेका हुन् ।
शिक्षा, स्वास्थ्य, कृषि, पर्यटन, स्वरोजगारलगायतका विषयमा चुनावी घोषणापत्रमा टेकेर काम गरिरहेको नगरप्रमुख शंकरप्रसाद उपाध्यायले अनलाइन सरोकारसँग बताए । गुणस्तरिय शिक्षाको सुनिश्चितता गर्दै सबै नागरिकलाई स्वास्थ्य सेवाको पहुँचमा ल्याउने, किसानलाई उत्पादनसँग जोड्नेसहितका काम गरिरहेको नगरप्रमुख उपाध्यायको भनाई छ ।
कृषि, शिक्षा, स्वास्थ्य, पर्यटन र सञ्चार, समुन्नत तिलागुफाको लागि सबल स्थानीय सरकार भन्ने नारा तय गरेर काम गर्दै आएको तिलागुफा नगरपालिकाले कृषि, पर्यटन, रोजगार, स्वास्थ्य, शिक्षा, उद्योग, व्यवसाय, सिप विकास र बजारीकरणलाई जोड दिएको छ ।
चालु आवका लागि तिलागुफा नगरपालिकाले ६३ करोड, ११ लाख, ५४ हजार, ८ सय २२ रुपैंया बजेट ल्याएको छ ।
