सिन्धुपाल्चोकको मेलम्ची नगरपालिका मेयर आइतमान तामाङले घरघरै पुगेर सेवा दिन स्वास्थ्यकर्मीलाई निर्देशन दिएका छन् । नगरपालिका जनस्वास्थ्य शाखाले आयोजना गरेको आर्थिक वर्ष २०७९-८० मा सम्पादित विभिन्न स्वास्थ्य कार्यक्रमहरुको नगरपालिका स्तरीय वार्षिक प्रगति समीक्षा कार्यक्रमको उद्घाटन गर्दै प्रमुख तामाङले नगरबासीको स्वास्थ्य उपचारमा कुनै कमी हुन नदिन र स्वास्थ्य सेवाको पहुँचमा नआएकालाई घरैमा पुगेर सेवा दिन निर्देशन दिएका हुन् ।
स्वास्थ्य क्षेत्र अति संवेदनशील भएकाले स्वाथ्यकर्मी आफ्नो जिम्मेवारीप्रति इमानदार ढंगले प्रश्तुत हुनुपर्ने मेयर तामाङको भनाई थियो । उत्कृष्ट सेवा प्रदान गर्ने स्वास्थ्य संस्थालाई पुरस्कार दिने र गैरजिम्मेवार भएको भेटिए कारबाही गर्ने समेत मेयर तामाङले बताए ।
आफु आएपछि स्वास्थ्यका क्षेत्रमा थुप्रै सुधारात्मक काम भएको मेयर तामाङको दावी छ ।
नगर उपप्रमुख उमा प्रधान, प्रमुख प्रशासकीय अधिकृत निमेष मिश्रलगायतले स्वास्थ्यकर्मीहरुलाई उच्च मनोवलका साथ काम गर्न आग्रह गरेका छन् ।
