धादिङको ज्वालामूखी गाउँपालिकाले पर्यटन प्रवर्द्धन गर्न थालेको छ । पर्यटनको प्रचुर सम्भावना भएको ज्वालामूखीका पर्यटकीय क्षेत्रको पूर्वाधार विकास र प्रचारप्रसारमा गाउँपालिका जुटेको हो ।
धादिङ जिल्लाको सदरमुकाम धादिङबेशीबाट करिब ११ कि.मि.को दुरीमा पर्ने ज्वालामूखीका चैनपुर, खरि, ढोला र मैदी क्षेत्रमा दर्जनौं आकर्षक पर्यटकीय गन्तव्य छन् । भौगोलिक हिसाबले गोलाकार बनावट रहेको ज्वालामूखीबाट पाविल हिमाल, गणेश हिमाल र टारहरुको मनमोहक दृश्यावलोक गर्न सकिन्छ ।
ऐतिहासिक जलमूखिमाइ, ढोला मण्डली, मैदी कोट, खरि कोट र चैनपुर कोट जस्ता धार्मिक, पुरातात्विक एबं पर्यटकिय प्रचुर सम्भावना बोकेको क्षेत्रको पूर्वाधार विकास र प्रचारप्रसारमा जुटेको गाउँपालिका अध्यक्ष यामनाथ दनैले बताए । सडक निर्माण तथा स्तरोन्नती, पर्यटकका लागि स्थानीय उत्पादनको परिकार खुवाउने गरी उत्पादन वृद्धि, किसानको आयस्रोत बढाउन उत्पादनको बजारीकरणमा समेत गाउँपालिकाले सहयोग गर्ने गरिएको अध्यक्ष दनैको भनाई छ ।
ज्वालामूखी अत्याधुनिक प्रविधि एवम् जलासययूक्त राष्ट्रिय गौरवको बुढिगण्डकी जलविधुत आयोजनाले प्रभावित क्षेत्रमा पर्दछ । आयोजनाको डुवान मध्ये ज्वालामूखी गाउँपालिकाको वडा नं. १ , ५ र ७ पर्दछन् । उक्त योजना सम्पन्न भए पश्चात संकलित जलासयमा जलयात्राको व्यवस्थापन गरि आन्तरिक आय वृद्धि गर्ने गाउँपालिकाको लक्ष्य छ ।
ज्वालामूखीले शिक्षा, स्वास्थ्य, कृषि, पर्यटन र पूर्वाधार गरी ५ वटा क्षेत्रलाई प्राथमिकतामा राखेर काम गर्दै आएको छ ।
