२०८१, २८ असार बिहीबार | Thu Jul 11 2024

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

सडक विकासले सुगम बन्दै पाँचथरको तुम्बेवा



भौगोलिक हिसाबले पाँचथर जिल्लाकै दुर्गम मानिने तुम्बेवा गाउँपालिका सडक विकाससँगै सुगम बन्दै गएको छ । जिल्ला सदरमुकामबाट ७२ किलोमिटर टाढा दक्षिणी क्षेत्रमा पर्ने तुम्बेवाका सबै टोलबस्तिमा मोटरबाटोको पहुँच पुगेपछि केही वर्ष अघिसम्म दुर्गम मनिने यो क्षेत्र सुगम बन्न थालेको हो ।

स्थानीय सरकारको अगुवाइमा तुम्बेवाका सबै ५ वटै वडाका टोलबस्तिमा समेत मोटरबाटोको पहुँच पुगेको छ ।

अहिले गाउँपालिका बनेको साविकका ४ गाविस आङ्गना, मौवा, वलने, र हाङ्गगुममा धुलेसडक समेत सहज बन्न सकेको थिएन । अहिले पालिकाको केन्द्र मौवा बजार आसपासको बजार क्षेत्रको सडक ढलान अन्तिम चरणमा पुगेको छ । १ नम्बर वडा कार्यालयको केन्द्र जोरसल बजार क्षेत्रमा पनि ढलानको काम भईरहेको छ । क्रमश: नम्बर २ को त्रिवेणी बजार, वडा नम्बर ४ को ओलनेदशमी र वडा नम्बर ५ को हाङ्गगुम स्थित तिल्केनी बजारसहितका मुख्य सडक ढलान गरिने र अन्य ग्रामिण सडकहरु पनि ढलान, सोलिङ र ग्राभेल गरिने गाउँपालिका अध्यक्ष बाबुराम खड्काले अनलाइन सरोकारसँग बताए ।

तुम्बेवा गाउँपालिकाले अघिल्लो वर्ष ४ सय मिटर पक्कि ढलान, ३ किलो मिटर ग्राभेल, १० किलोमिटर ढुंगाको सोलिङ र ३५० किलोमिटर कच्चि सडक र साँवा खोलामा २ वटा पक्कि पुल निर्माण गरेको थियो ।

यस वर्षपनि सडक विकासलाई प्राथमिकतामा राखिएको छ ।

सबै वडाका टोलबस्तिमा पुगेको सडक स्तरोन्नती गर्दै मौवा बजार र जोरसल्ले बजार आसपासमा ३ किलोमिटर सडक ढलान गरिने गाउँपालिका अध्यक्ष खड्काले बताए । सडकको तिव्रतम् विकासले स्थानीयलाई आवत जावत गर्न, उपचारका लागि अस्पताल जान, स्थानीय उत्पादनको बजारीकरण गर्न र यस क्षेत्रको अन्य पूर्वाधार विकासमा समेत टेवा पुगेको अध्यक्ष खड्काको भनाई छ ।

गाउँपालिका भित्रका सडकलाई तमोर करिडोरसँग जोडेर तुम्बेवाको उत्पादन मकै, कोदो, धान, दाल, बदाम, कपास, अलैची, अदुवा, अम्लिसो, चिराइतो, अर्गेलीलाई बजारीकरण गर्ने स्थानीय सरकारको लक्ष्य छ ।

गाउँपालिकाको सिमाना सबै तिर खोला र नदीले छुट्याएको तुम्बेवामा सडक सँगै खोलाहरुमा सडक पुल निर्माणको पहल भईरहेको गाउँपालिकाले जनाएको छ ।

स्थानीय सरकारको अगुवाइमा भएको सडक विकासले स्थानीयको दैनिकीमा सहजता आएको छ । दिगो सडक विकासपछि भएको परिवर्तनले तुम्बेवाका नागरिकहरु खुसी भएका छन् ।

प्रकाशित मिति : २०८०, १२ कार्तिक आइतबार ००:००  १ : ३३ बजे