जुम्लाको गुठीचौर गाउँपालिका कर्णाली प्रदेशको पहिलो पोषणमैत्री स्थानीय तह बन्ने भएको छ । कुपोषण हटाई पोषणमैत्री पालिकाको सूचक पुरा गर्नेमा हालसम्म कर्णाली प्रदेशमा गुठीचौर अगाडी छ ।
सोमबार बसेको गाउँसभाले पोषणमैत्री स्थानीय तह तथा वडा घोषणा कार्यविधि पारित गरेको छ । पोषणमैत्री पालिकाको सूचक पुरा गरेर गुठीचौरलाई सफा सुन्दर स्वस्थ र उत्कृष्ट पालिका बनाउने योजना अनुसार कार्यविधि ल्याइएको गाउँपालिका अध्यक्ष दानबहादुर बुढाले बताए । पालिका भित्रका सबै वडालाई क्रमशः पोषणमैत्री वडा घोषणा गरेर सबै सुचक पुरा भएको एकिन भएपश्चात पोषणमैत्री पालिका घोषणा गरिने अध्यष बुढाको भनाई छ ।
सत्रौं गाउँसभाले भवन निर्माण तथा नक्सापास कार्यविधि, प्राविधिक फिल्ड भत्ता कार्यविधि, भूकम्पीय जोखिम मूल्याङ्क मापदण्ड, खर्च व्यवस्थापन र पोषणमैत्री स्थानीय तह तथा वडा घोषणा कार्यविधि पारित गरेको छ । सबै नीति, कार्यविधि र विधेयक सर्वसम्मतिले पारित भएका हुन् ।
पालिकाको कार्यसम्पादनलाई छिटो छरितो तथा नागरिकमुखी बनाउन कार्यविधि तथा मापदण्ड पारित गरिएको गाउँपालिकाले जनाएको छ ।
